Deboto nagpaambit ug milagro

Norma Cardeno Vicente Ferrer devotee

Norma

Kapistahan sa San Vicente Ferrer GKK–Mulig gidayo

Ang GKK San Vicente Ferrer-Mulig nagsaulog sa iyang ika-88 nga anibersaryo niadtong Abril 5. Subay sa tema: “San Vicente Ferrer, Ang Tinun-an nga Nagmasinugtanon sa mga Pagtulon-an sa Dios,” ang misa sa buntag gipangunahan ni Arsobispo Romulo G. Valles, D.D.

Ang selebrasyon pasalamat sa mga grasya ug mga milagro nga nabuhat ni Sr. San Vicente Ferrer sa ilang kinabuhi. Midagsa ang mga tawo gikan sa nagkalain laing lugar aron makatambong.

Matud pa sa PSK nga si Felipe Carcueva maskin gamay lang sila sa kapilya, ila gayung ginapangandaman ang pagdagsa sa mga deboto. “Matag tuig mangandam jud mi alang sa iyang kapistahan. Kaning kadaghan sa tao mga dayo rana sila.”

Pagsulay sa pagtuo

Matag-usa kanato nga nabuhi niining kalibutan makasulay og bisan unsang kalisod. Ug tungod sa atong pagsalig sa Ginoo ug sa mga santong atong gitagaan og dakong pagtuo, nahimo kitang malig-on sa bisan unsa mang pagsulay na atong maagian.

Usa niini, ang sugilanon sa usa ka inahan na si Norma Cardeño. Daku ang iyang pagtuo kang Sr. San Vicente Ferrer, busa sa kalisud nga naagihan, wala siya nawad-an og paglaum og pagtuo sa kaayuhan niining santo.

Usa niini ang pagpangayo ug tabang sa iyang kabanay kaniadtong nagmabdus pa siya, nga luwason siya ug ang ilang anak ug matawo na kini tungod kay nilapas na kini sa taknang adlaw sa pagpanganak. Ug nanganak siya sa adlaw nga iyang gipangayo.

Buwan sa Disyembre giataki siya ug mild stroke. Miduol ang iyang anak kay Sr. San Vicente Ferrer ug nangayo ug tabang ug nisaad nga magdagkot na kini matag Dominggo. Ug nakaluy-an sa Ginoo pinaagi sa pag-ampo sa santo naayo siya ug dali, makalakaw-lakaw ug makaalsa na siya ug balde.

Miabot ang adlaw nga ang iyang kamanghurang anak gusto mo eskwela ug college ug dili niya makaya ang pagpa-skwela niini. Naningkamot sila na makakita ug scholarship ug nangayo ug tabang kay San Vicente. Gidungog ang ilang pag-ampo. Niadtong milabay nga Biyernes ni graduate iyang anak sa pagkamaestra.

Dako ang ilang pagtuo kay Sr. San Vicente Ferrer nga maluluy-on sa tanang butang. Sumala pa nila, wala sila kung wala kini nga santo ug labaw na ang Diyos na makagagahum sa tanan.

Si Sr. San Vicente Ferrer ang patron sa mga magtutukod tungod sa iyang kabantug alang sa pagtukod ug pagpalig-on sa simbahan, pinaagi sa iyang pagsangyaw, buhat sa misyonaryo ug sa iyang pagtulun-an.

Si Sis. Norma usa lamang sa mga deboto nga mibisita atol sa kapistahan sa GKK. Usa siya sa mga nakasaksi sa malinawon ug malampuson nga selebrasyon. (Jessabelle Dolosa | Jossabel Gonzales | Interns, Fr. Saturnino Urios University)

Post Your Thoughts