“For me to live is Christ”

‘Salig sa grasya sa Diyos, pagpangga sa pamilya, pag uban sa kaparian, ug pagmahal sa imong mga higala,’ mao kini ang mensahe ni Abp. Romulo G. Valles, D.D. kang Reberendo Padre Cristopher Repollo Alcayde sulod sa iyang ordinasyon sa San Isidro Labrador Parish, Lumondao, Marilog District, Davao City niadtong Abril 24, 2017. Tema nga iyang napili sa maong selebrasyon mao: “For me to live is Christ.”

Mga pari ug deacon gikan sa nagkalain-laing parokya sa Davao, Tagum, Kidapawan, Dipolog, Butuan, ug Basilan ang nitambong. Gawas sa kaparian nitambong usab ang mga layko, mga higala ni Rev. Alcayde ug ang iyang pamilya.

Sa iyang wali, gisulti niya nga dako kaayo ang iyang kalipay ug angay buhion sa kasing-kasing ug huna-huna sa matag-usa nga hinumduman nga “walay kinutuban, always there, everlasting, eternal ang pagpangga sa Diyos.”

Iyang gipaambit ang iyang dakung kalipay kay aduna napud bag-ong mga pari sa Dabaw, ug kay kini gasa man sa Diyos alang sa Simbahan ug alang sa katawhan nga iyang pinalangga.

SUPORTA SA PAMILYA

Sulod sa Santos nga Misa, emosyonal ang inahan ni Fr. Alcayde tungod kay nagmalampuson ang ordinasyon sa iyang anak. “Dili masukod ang akong kalipay nga gibati busa nagapasalamat ako ug daku sa Ginoo ug sa mga tawo nga mitabang kanamo.”

Si Rev. Fr. Alcayde, adunay upat ka igsuon ug ang usa niini nisulod usab sa seminaryo. Si Junelle R. Alcayde miingon, “daku kaayo akong pasalamat kabahin sa bokasyon sa iyang pagka pari kay luyo sa mga kalisdanan nga gisagubang sa among pamilya, ang dakong pagtoo sa Ginoo nagauban gihapon sa amo. Isip kamanghuran ako lang jud maingon nga ang gugma sa ginoo magapanalangin sa iya kanunay kung asa man siya (dad-on) sa pagsangyaw sa ebanghelyo sa Ginoo.”

SUPORTA SA HIGALA

Naghatag pud ug mensahe ang pipila ka mga tawo nga suod sa kasingkasing ni Fr. Alcayde. Usa niini si Fr. Edsel J. Paloma, kura paruko sa San Isidro Labrador Parish. Nanghinaot siya nga mamahimog matinud-anon kini sa pagkapari labi na sa pagtubag sa tawag sa Ginoo, “ nga sa matag adlaw sa iyang kinabuhi, unahon jud ang Ginoo, faithfulness”, matud pa ni Fr. Paloma.

Ang iyang batchmate nga si Fr. Franklin Floyd Costan nga gikan pa sa Prelature sa Isabela, Basilan naghatag sab sa iyang mensahe: “He is the last in our batch nga ma-ordinahan, 12 mi ni graduate last 2015, ug siya ang pinakalast pero ingon gani nila, ‘Save the best for last.’ I pray that Fr. Cris will become a holy and good priest in the vineyard of the Lord and let us pray for each other.”

Si Fr. Alcayde natawo niadtong Abril 3, 1988. Nagpuyo siya Santo Niño, Marilog District, Davao City. Dinhi usab siya nagsaulog sa iyang unang misa. Ang iyang ginikanan mao sila Ofelia Isogon R. Alcayde ug si Mr. Elisio C. Alcayde.

Nahuman niya ang iyang elementarya tuig 2001 sa Santo Niño Elementary School, sekondarya sa Marilog National High School tuig 2005, ug sa St. Francis Xavier College Seminary, dayon sa Regional Major Seminary of Mindanao, Davao City niadtong tuig 2015. Siya ang kinaunhang seminarista nga nahimong pari gikan sa Lumondao nga giporma sa seminaryo dinhi sa Dabaw.

Matud pa ni Rev.Fr. Alcayde, ang nagpalig-on kaniya diha sa pagpadayon sa pagkapari, mao ang kasinatian sa gugma ug kaayo sa Diyos kay bisan paman sa ilang kawad-on, wala sila pasagdi sa iyang pamilya. Ang gugma, grasya ug kaluoy sa Diyos sa iyang kinabuhi, mao ang kanunay nga nagtukmod kaniya nga magpadayon ug pangandoy aron ipaambit sa katawhan ang gugma sa Diyos.

“Wala jud koy lain maingon kundi ang akong tinuuray ug kinasingkasing nga pasalamat sa tanan tungod kay dili nako ni maabot karon kung wala ang mga pari, mga layko, akong mga higala, mga pamilya, nga mitabang sa pagsuporta kanako. Kanunay tamo iapil sa akong pag-ampo ug hinaot na iapil pud ko ninyo sa pag ampo nga unta magmalahutayon ako nga mahimo ug maayo, buotan, ug balaan nga alagad sa Diyos,” panapos ni Fr. Alcayde. (Jossabel Gonzales, Father Saturnino Urios University intern)

Post Your Thoughts