GKK sa Dacudao nagsaulog sa pista

Ang GKK San Vicente Ferrer sa Mary Help of Christians Parish, nagsaulog sa ilang ika-duhang kapistahan kaniadtong Abril 5, 2017. Gisugdan kini ug Santos nga Misa, pinanguluhan sa kura-paroko sa maong parokya nga si Rev. Fr. Marcelino Benabaye, SDB, diha sa santos nga misa gisaysay ni Fr. Ben ang kinabuhi ug ang mga kaagi ni San Vicente Ferrer aron madasig ang tanang miyembro diha sa GKK ug aron mahatagan sila ug kahibalo mahitungod sa ilang patron. Mapasalamaton usab kaayo si Fr. Ben sa mga pangulo nga nagpaluyo sa mga kalihukan, sa paghatag ug importansya sa mga bata ug mga kabatan-onan nga mapaduol diha sa Ginoo isip mga sumusunod nga mga pangulo diha sa ilang GKK ug nanghinaut usab siya nga kini mulambo ug magpadayon pa sa mga umaabot pa nga mga tuig.

Human sa Santos nga Misa gisunod na dayon ang pagbunyag ug ang pagblessing sa ilang ginasugdan nga Groto nga proyekto sa ilang Junior DAYCA pinaagi sa pagbaligya ug mga botilya, plastik, lata ug bakal nga ilang ginakolekta diha sa ilang binulan nga meeting ug pagkahuman gisunod na ang pagpaniudto diha sa ilang GKK. Sa ala una na ang takna gipahigayon ang parlor games nga para sa mga bata, batan-on ug mga hamtong, pinanguluhan kini sa ilang PSB nga si Cres Noven Mahinay. Nagpasalamat ug dako ang ilang PSK nga si Trinidad Ballego nga nahimong malampuson ug mabungahon ang pagsaulog nila sa kapistahan ni San Vicente Ferrer. Nalingaw gayud ang tanan. (Jonah Reya Somogod | MHCP SoCCom)

Post Your Thoughts