Registered nurse na, pari pa

Human sa ordinasyon buot pa niyang magtuon

Ang ordinasyon ni Fr. Jeus P. Jardin gipahigayon sa Shrine of Our Lady of The Most Holy Rosary Parish sa Buhangin, Davao City niadtong Abril 22, 2017. Kini gitambungan sa 44 ka pari gikan sa managlahing parokya sa Diyosesis sa Davao.

Mitambong usab ang kapamilya sa bag-ong naordinahan lakip ang iyang mga suod nga higala, ug mga parokyano aron musaksi.

Ang santos nga misa gipangulohan ni Davao Archbishop Romulo G. Valles, D.D. Sa homiliya sa Arsobispo, nibungat siya sa iyang panghinaut nga unta madugangan pa ang mga mosulod sa bokasyon sa pagkapari aron sa pagpadayon sa pagsangyaw sa pagtulon-an sa Katoliko nga simbahan.

Sulod sa santos nga misa, gihatagan ug higayon si Fr. Jardin nga makapaambit sa iyang dakung pagpasalamat ngadto sa Ginoo nga labaw’ng makagagahum, sa suporta sa iyang mga kaigsuonang pari, sa iyang pamilya, mga kahigalaan, ug sa mga tawo nga nitabang sa tanang aspeto, hilabi na gayud matud pa sa mga nag-ampo alang kaniya.

“Well, humanly speaking,” matud niya, “there will always be a supernatural side diha, which is that of gratitude because this vocation, ultimately, is grace, grasya man ni sa Ginoo.”

Dakung kalipay usab ang gibati sa iyang mga ginikanan kay naabot ra gayud sa ilang anak ang dugay nang gipangandoy niini. Sila nanghinaut nga magmalampuson ug magmalipayon gayud siya sa gipili niyang bokasyon.

Ang iyang amahan nga si Danilo Manuat miingon, “malipayon kaayo mi nga nakab-ot ra gyud niya ang dugay ra niyang gipangandoy…gani gihatag g’yud namo ang among suporta sa iyaha sa pagkuha pa lang niya ug kursong nursing, apan niingon g’yud siya sa amo nga magpari g’yud daw siya, so, ang amo na lang pod nga ikahatag is padayon lang gihapon nga pagsuporta kay mao man na iyang gipili, gitawag man g’yud siya sa Ginoo para ani nga bokasyon. Ang amo na lang nga panghinaut nga unta magmalipayon ug magmalampuson siya sa iyang bokasyon.”

Si Rev. Fr. Jeus Pontigon Jardin natawo niadtong Disyembre 5, 1981 sa Gabaldon Nueva Ecija. Usa siya sa duha ka anak nila Danilo Manuat Jardin og Lorelle Pontigon Jardin.

Nahuman siya sa hayskul sa Holy Cross College of Sasa ug migradwar sa elementarya sa Fatima de Davao, Sasa. Nahuman siya sa kursong Bachelor of Nursing sa Davao Doctors College, Master in Nursing sa Liceo de Cagayan University, Bachelor in Philosophy ug Bachelor in Sacred Theology sa University of Navarra, Spain.

Sa pagkakaron, duna siyay plano nga mopadayon sa pag-eskwela ug mokuha og Licenciate in Moral Theology karong umaabot nga Agosto sa University of Navarra, Spain. (Cherry Rose Ligtas | Father Saturnino Urios University intern)

Save

Post Your Thoughts