Isabwag ang Maayong Balita

Adunay usa ka karaang istorya bahin sa pag kunsad ni Hesus sa langit, matod pa sa dihang nagapataas si Hesus sa langit kauban ang mga anghel, usa sa mga anghel ang nangutana kang Hesus kung unsa kuno ning mga puntik sa kahayag nga ilang makita samtang naga pataas sila palayo sa kalibutan.

Si Hesus mingtubag sa anghel nga kanang mga puntik sa kahayag mao ang iyang mga sumusunod nga mupakatag sa Maayong Balita sa tibuok kalibutan. Sa pagkadungog sa anghel sa tubag ni Hesus siya nalibog ug miingon, apan Ginoo dako kayo ang kalibutan unya kining mga puntik sa kahayag perti man nga gamaya lang, daw mura ug kulang kini para ipakaylap ang Maayong Balita sa tibuok kalibutan, unya midugang ang anghel, Ginoo naa ba kay “plan B” kung man galing mapakyas ning imong mga sumusunod?

Si Hesus mitubag, wala na gayud ako’y “plan B” mao ra gyud ni sila ang akong gisaligan. Karong Dominggoha atong gisaulog ang Solemnity of the Ascension of the Lord. Sa atong ebanghelyo gimanduan ni Hesus ang iyang mga tinun-an sa pagpakaylap sa Maayong Balita sa tibuok kalibutan, ug sa pagpamunyag sa ngalan sa Amahan, ug sa Anak, ug sa Espiritu Santo.

Ang kalayo sa kahayag ni Kristo karon iya nang gitugyan sa iyang mga tinun-an, sila karon gitahasan na ni Hesus ug gitugyanan na niya sa iyang misyon. Kitang mga Kristiyanos, mga sumusunod ni Kristo, gitugyanan usab niya niining maong misyon karon, ang pagpakaylap sa Maayong Balita sa tanan ug sa tibuok kalibutan, kita karon pinaagi sa atong bunyag nahimong magdadala anang kahayag ni Kristo para sa uban, gisaligan ta ni Kristo nga ipakatag nato ang iyang kahayag diha sa uban, dinhi sa atong sosyodad nga usahay nabalot sa kadag-um ug kangitngitan, kita ang “plan A” sa misyon ni Hesus.

Karong Dominggoha ato pong gisaulog ang “World Communications Day”, ang komunikasyon nakahimo nga tanang matang sa impormasyon makab-ot sa kadaghanan sa labing mubo nga panahon, karon igo nalang nga mu-click kita diha sa internet o sa atong mga cellphone para mahibalo sa mga panghitabo sa kalibutan o maski diha sa atong mga higala.

Kung ato lang pud siguro mapahimuslan ang mga teknolohiya sa komunikasyon diha sa pagpakaylap sa Maayong Balita, mas paspas siguro mukaylap ang kalayo ni Kristo dinhi sa kalibutan. Hinaot pa unta nga diha sa atong paggamit sa nagkadaiyang teknolohiya sa komunikasyon ug social media applications makita sa uban nga kita mga sumusunod ni Kristo, diha sa atong mga posts, sa atong mga “tweets” ug sa sa atong mga pictures para mas mahimo kita nga mga alagad ni Hesus nga andam ug tataw nga nagapakaylap sa iyang kahayag ug maayong balita sa uban.