Si Kristo sa Balaan nga Krus

Hiyee! Basta Mayo kargado gyud sa pista ug uban pang selebrasyon. Ania ang usa ka artikulo nga akong nasulat human mi nag cover sa Talicud Island. Salamat sa parish soccom ug mga parokyano pinangunahan ni Fr. Rico Enriquez, DCD.

* * * * * *

via crucis holy cross sta. cruz stock photoKapin bente ka lantsa ug mga charter boat ang miapil sa fluvial procession alang sa kinaunhang kapistahan sa parokya ni Sta. Cruz, Talicud, Island Garden City of Samal usa ka adlaw una nagpista niadtong Mayo 2. Madasigong nanguyog ang mga parokyano ug bisita niining mga sakyanang pandagat nga mituyok sa nasabutang ruta hangtud sa misa nga gipangulohan ni Fr. Cristopher Alcayde. Si Fr. Alcayde nangumpisal nga first time niyang muapil sa fluvial procession. Kabahin ang parokya sa iyang pormasyon isip bag-ong pari nga naordinahan niadtong Abril. Sa Sta. Cruz siya nag exposure sa una.

Sa adlaw sa pista, setentay dos (72) ka mga bata ug batan-on ang gikompirmahan human ang fiesta mass. Ang fiesta mass nga gi-cover sa DXGN 89.9 Spirit FM, gipangulohan sa arsobispo sa Dabaw, Romulo G. Valles niadtong Mayo 3 sa buntag.

Gisugdan ni Abp. Valles ang iyang wali sa pagpasabot sa kamahinungdanon sa napiling simbolo sa kapistahan nga mao ang krus. Matud niya, “dunay pipila ka parokya nga magpili ug usa ka dimension sa pagluwas ni Kristo, nagmahimo pong inspirasyon nato nga mahimong maduol kanato sama sa Sacred Heart of Jesus (Obrero, Calinan) o Holy Trinity, Corpus Christi, Transfiguration of the Lord, aspeto sa kinabuhi sa iyang pagluwas kanato kay dili man ni santos nga tawo atong patron, apan usa ka lihok ni Kristo, mao ang Balaan nga Krus.”

Dugang niya nga “ang Via Crucis, ang Dalan sa Krus mao ang Diosnon nga dalan padulong sa langit. The ways of God are not the ways of men. Ginoo, himua akong masaligon kanunay sa dalan sa Krus. Kung hunahunaon lang nga kining atong krus padulong sa dalan sa kaluwasan, medyo mabawas bawasan ang atong pag complain…Pas-ana imong krus nga naay kahulogan, krus nga anaay commitment. Ang dalan sa krus magadala kanato sa kinabuhi nga walay katapusan, kalipay.”

Sa pikas bahin, giyagyag sa kura paroko nga si Fr. Rico Enriquez nga human sa fiesta, mag “focus lang sa ta sa mga activities, siguro sa umaabot, sama sa pagpakural labi na dinhi sa Sta. Cruz Parish, Talicud.” Mensahe sa pari sa iyang parokyano, “padayon sa paghupot sa pagtoo diha sa mahigugmaon ug maloloy-on nga Diyos, diha sa pagpadala sa iyang anak. Hinaut nga ato kining ipaambit sa atong isigkaingon.”

Ang adlaw sa pista, Mayo 3, gisubay sa karaang piyesta sa Talicud atol sa pagkakaplag sa krus. Kining adlawa pagsaulog dili sa krus, apan sa gihimong sakripisyo ni Kristo, diha sa iyang pag ula sa iyang dugo tungod sa gugma diha sa Krus. Happy 1st Fiesta! Viva Sta. Cruz!

Post Your Thoughts