Bible reader ka ba?

Kinsa may nagsulti nga kinahanglan ang printed nga kopya sa bibliya aron lang makabasa sa Good News?

Matud pa sa survey niadtong 2011 nga gipagula sa US-based research center, 86.8 milyon sa populasyon sa nasud Pilipinas, mga Katoliko. Ikalima ang Pilipinas sa tibuok kalibutan nga adunay kinadaghang ihap sa Kristiyano. Sa Asya, numero uno sa ranking ang Pinoy sa kadaghan sa Kristiyano. Kun ang pagbasa sa Pulong sa Diyos ang basehan sa pagtubo sa kinabuhing ispiritwal, pila man kaha kanato ang Bible readers?

Sa samang tuig, nahibaw-an nga 6 sa 10 ka Pinoy, wala nagabasa o wala g’yuy Bibliya. Kini 60% sa populasyon sa nasud, matud pa sa survey sa Philippine Bible Society (PBS). Makaalarma, apan oportunidad daw kini aron makab-ot ang mga batan-ong uhaw sa Pulong sa Diyos, matud pa ni Fr. Oscar Alunday, ang executive secretary sa Catholic Bishops’ Conference of the Philippines’ (CBCPs) Episcopal Commission on Biblical Apostolate (ECBA). Kompetisyon kuno sa bibliya ang romance pocketbooks, horoscopes, feng shui, ug internet labi na ang online games, ug social networking sites.

Aron matubag ang kauhaw sa Pulong sa Diyos sa smartphone ug tablet users, gilusad niadtong 2012 sa PBS ang audio Bible nga available na karon sa English, Tagalog ug Cebuano.

Sa GMA’s online post, namahayag si San Fernando Auxiliary Bishop Pablo David, ang chairperson sa CBCP’s ECBA nga dili tanan interesado mubasa sa Bibliya, mao nang iyang gipromote ang “audio Bible.” Apan kini wala magpasabot nga dili na maayo ang hard copy, kay bisan pa nga daghan na ang nagagamit ug cellphones ug iPAD, maayo gihapon kuno nga aduna kitay hard copy sa bibliya. Dili sad daw kita angay ma-alarma sa bag-ong pamaagi tungod nagabag-o daw ang pamaagi sa pagtuon sa tawo, maong sulayan ang audio-visual nga presentasyon.

Gipaila sab sa PBS ang “e-Bible” kon electronic version sa Bibliya isip tubag sa panawagan nga magamit ang midya sa maayong pamaagi, dugang pa ni Bishop David.

Tuig 2008, gipagula ang “Bible Anime” sa CBCP, PBS ug Enzima International Inc. diin makita ang Sunday readings ug animations via multimedia messaging service. Katuyuan niini nga daghan pa ang madani sa pagbasa sa Bibliya. Namaligya usab sila ug 5 ka milyong baratong Bibliya niadtong 2009 hangtud 2014 aron mas daghan pa ang makapanag iya niini.

Populasyon sa Pilipinas niadtong niaging tuig 2016, 102 milyon, 80 niini, mga Katoliko, matud pa sa National Statistics Office ug CIA World Factbook. Sa Davao City, 1.7 milyon ang populasyon, 1.4 milyon niini, mga Katoliko matud pa sa City Planning Office.

Mamahimong magdownload ug libreng mobile applications: www.bible.com/app, www.e-sword.net, ebible.org, o www.bible.com/kids.