Ang Debosyon ug pagtugyan-paghalad sa Putling Kasingkasing ni Maria

Ikatulong Bahin

Kinahanglang natong tan-awon ang mga pulong sa Mahal nga Birhen ngadto sa mga bata sa Fatima, ug sa sunod nga mga tuig ngadto kang Sr. Lucia dos Santos. Ang Mahal nga Birhen naghatag og pipila ka mga hangyo mahitungod sa debosyon-pagtugyan-paghalad sa Putli nga Kasingkasing.

Aron atong mapuy-an ang pagtugyan:

  1. PENITENSYA UG PAG-AMPO, kinasingkasing gibuhat aron pagbiya sa sala ug alang sa pagkakabig sa mga makasasala- ang mga walay pagtuo, walay paglaum, walay pagsimba sa Dios, walay paghigugma. Kining pagpenitensya nag-apil sa mga sakripisyo ug pagdawat sa mga pag-antus nga ihalad alang sa mga makasasala.Ang pag-ampo labaw sa tanan mao ang pag-ampo sa rosaryo,labi na gayud kon mahimo sa matag adlaw alang sa pagkakabig sa mga makasasala ug alang sa kalinaw.
  2. PAGBAYAD SA SALA, sa naandan nga mga debosyon maoy gibuhat sa mga Hora Santa atubangan sa Santissimo Sakramento. Ang pagbayad sa sala gisabot nga paghupay sa Mahal nga Kasingkasing ni Jesus tungod sa mga pag-antus nga iyang naagian sa iyang pagpasakit ug paghupay niya sa iyang pagsud-ong sa mga sala nga nakapahiubos kaniya sa atong panahon. Apan hinumduman nato nga si Cristo sa Eyukaristiya mao si Jesucristo nga gilansang sa Krus ug nabanhaw sa iyang himaya. Si Cristo sa iyang himaya dili na mag-antus, ang mga pag-antus sa iyang lagda sa kasakit ug kamatayon wala na karon. Mahitungod niini daghangmga teologo nangutanakon makatabang ba gayud kini.

Lain nga paglantaw sa pagbayad mao kini nga ang Dios dili man gyud kaayo mahiubos sa sala ug sa kinabuhi sa mga makasasala, ang pagbayad mao ang masubsob nga pagpaningkamut sa pag-unong sa kabubot-on sa Dios diha sa pagtuman sa mga buluhaton ug tulumanon sa adlaw-adlaw; ang pagtuman sa tinuod nga pagkamatarong ug kaangayan diha sa atong pagsubay sa balaod sa Dios. Buhaton kini aron pagbuntog, pagsupak ug pagbayad sa mga sala ug sa pagkamasal-anon nga supak sa mga pamaagi sa balaod sa Dios, nga nakapahiubos sa Dios diha sa pag supak niini sa mga sugo sa Dios ug sa iyang kabubot-on sa atong kinabuhi sa matag usa, sa banay, sa katilingban, sa nasud ug sa kalibutan.

Busa tukma sa teolohiya ang pagsabot sa pagbayad sa sala isip mainitong pagsalmot ug pag-ambit sa misteryo sa pagpakamatay ug pagkabanhaw ni Jesus, isip pag-ambit sa tahas ni Jesus sa pagbuntog sa sala ug pag-gun-ob sa gahum sa sala diha sa kinabuhi sa matag tawo ug sa kinabuhi sa tawhanong katilingban.
Ang pagbayad sa sala, diay, nagpasabot, sa “pag-ambit sa paghalad sa kaugalingon ug makaluwas nga buhat ni Jesus, diha kaniya, ug uban kaniya pagbunyog sa sala pag-ayo sa giguba sa sala, sa kadawo ug kahakog,sa kakulang sa katarungan ug kaangayan, sa mga madug-anong mga paagi, kay kini nagsamad man ug nagguba sa tawhanong kinabuhi karon.”

Si Papa Pablo VI miingon nga ang kapuno sa pagbayad nga gipaabut sa Mahal nga Kasingkasing ni Jesus (ug atong idungag, ang Kasingkasing ni Maria) mao ang pagtukod sa tinuoray nga sibilisasyon (kapupud-an) sa gugma.” Nagpasabot kini sa pagtukod sa tawhanong panaghiusa, kaangayan, ug maluloy-ong gugma sa atong mga relasyon ug mga katilingban.

Pinaagi sa pag-ampo ug pagpenitensya diha ug uban sa Mahal nga Kasingkasing ni Jesus.

Pinaagi sa paglihok alang sa Kaangayan ug Katarungan ug Kalinaw nga sinukad ug dinasig sa gugma ni Cristo.”

Misulat usab si Sr. Lucia nga usa ka gabii, samtang nag-hora santa siya, ang atong Ginoo niingon kaniya, “ Ang pagtuman sa buluhaton ug ang pagsubay sa akong Balaod mao ang sakripisyo (sa pagbayad) nga gipangayo sa matag usa. Kini mao ang penitensya (ug pagbayad) nga karon akong gihangyo ug gipangayo.”

Pagbayad pinaagi sa pag-ampo ug pagbuhat: gihangyo kita sa pagmatuod niining buhat sa pagbayad pinaagi ug uban sa linagbasang Kasingkasing sa Gilansang ug Nabanhaw nga Jesus ug pinaagi ug uban sa Putli nga Kasingkasing ni Maria pinaagi sa gahum sa ilang kinuptanan sa gugma ug kaluoy.

Sa katapusan, ANG PAGKALAWAT SA PAGBAYAD, nga buhaton sa matag Unang Sabado sa bulan (sulod sa 5 ka bulan o kapin) alang sa mga katuyoan nga nahisgotan na. Ang pagdawat sa sakramento sa kumpisal o pagpakighiuli angay nga buhaton bisan nga kini mahimo buhaton sa laing adlaw. 15 minutos nga pagpakig-uban kang Maria nga mamalandong sa mga misteryo sa kinabuhi sa atong Ginoo ug sa lagda sa kinabuhi sa Mahal nga Birhen, ug ang pag-ampo sa rosaryo.

No Comments

Post A Comment