Ang Maayong Binhi Muturok ug Mamonga sa Maayong Yuta

Ika-15 nga Domingo sa Ordinaryong Panahon
Is. 55:10-11/ Ps. 65/ Rom. 8:18-23/ Mt. 13:1-23

Adunay tulo ka bahin sa atong pamalandong karong Dominggoha:

Unang bahin; backgrounder: ang pamaagi sa pagtanom o pagpugas sa Palistina sa panahon ni Jesukrisrto. Ang tigpugas magdala ug binhi unya iya kining isabod sa inandam nga luna, mao nga ang binhin mahulog sa nagkalainlaing dapit. Mao kini ang gipadayag diha sa atong Ebanghelyo nga adunay nahulog sa dalan, sa kabatoan, sa sampinitan ug sa maayong yuta… Ug mao kini ang gigamit ni Kristo nga sambingay ngadto sa mga tao nga namati ka niya.

Ika-duhang bahin; ang mensahe niini alang kanato: unang mensahe: Ang Ginoo maayo gayod sa tanan kay diha sa sambingay bisan pa man ang tao dili angayan tungod sa daw bantok nga yuta o daw bato o daw sampinitan nga kasingkasing sa tawo Iya gihapon nga gisaboran sa Iyang binhi sa kaluwasan ang tawo.

Ika-duhang mensahe: Ang Ginoo wala magkuwenta sa nausik o mausik nga binhi o mensahe mao nga wala siya muhunong sa pagsabod sa binhi. Gani hangtod karon ang Ginoo nagpadayon sa pagsabwag sa mensahe; diha sa atong pag-apil sa Kasaulogan sa Pulong sa atong GKK; sa atong paghimo ug Bible Sharing, sa atong pagbasa sa Bibliya ug labaw sa tanan sa atong pagsaulog sa Santos nga Misa. Niining mga higayuna ang Dios padayon nga nagasabwag sa binhi sa KINABUHI diin kita gihatagan ug kahigayonan nga makadawat niini.

Ika-tulong bahin; Ang hagit alang kanato; sa atong Ebanghelyo adunay upat ka klase sa luna diin ang maayong binhi nahulog. Apan diha lamang sa maayong yuta miturok ug nakapamunga ang maayong binhi. Ako, ikaw, kitang tanan nga kron nakadungog sa maong sambingay kay matod pa ni Kristo: “pamati kamo kun kamo adunay dalonggan.” Unsang klase nga pagkayuta, bantok ba, batoon ba, sampinitan ba, o maayo bang yuta? Kung maayo naka bunga ba ang mga mensahe nga atong nadungog, tungod kay mao kini ang ilhanan nga ang nahulogan sa binhi maayong yuta kun kini nakapamunga. Apan kun dili ang dios nagtawag kanato ngadto sa pagbag-o pinaagi sa makanunayong pagpamati sa iyang mensahe tungod kay dili gayod kini makawang. Sumala sa unang pagbasa ang Pulong sa Dios matuman gayod. (Rev. Fr. Johnny Autida)