Pride sa Dabaw sa boxing mibisita

Ang 25 anyos nga si IBF World Superweight Champion Jerwin Ancajas mibisita sa Dakbayan sa Davao niadtong Hulyo 11 diin gitagaan gilayon ang boksidor ug usa ka Heroes Welcome sa iyang pag-abot sa dakbayan tungod sa iyang kadaugan. Gipasidungan sab siya sa regular session sa konseho.

Kuyog ni Ancajas ang iyang nahimong coach nga si Joven Jimenez, ug sila si Games and Amusement Board Chairman Abraham Mitra, Commissioner Frits Gaston ug Commissioner Edward Trinidad.

Gipasalamatan sa boksidor ang mga Davaoeños sa tanang suporta tungod nahimo kining tulay sa iyang kadaugan. Gipaambit sa boksidor ang iyang kasinatian una pa siya nahimong professional boxer. Sumala pa nga daw sama siya’g ulod nga mikamang usa siya mi kampeon sa international boxing federaton. Dugang pa nga nahimo siya kaniadto nga usa ka tig deliver ug maruya dinhi sa dakbayan sa Dabaw.

“Proud kay ko nga first time nako nakagunit ug gloves dire jud sa Almendas gym, labi na init kaayo ang pagsalubong sa akoa sa mga konsehal, pasalamat jud ko, year 2000 naa ko dire sa Davao, 9 anyos ko miadtu sa Panabo ug na propesyunal ko 2009, 17 anyos ko ato,” sumala ni Ancajas.

Mamunit sad sumala pa siya ug bakal aron lamang masudlan ang nagkutuy nga tiyan, hinungdan nga gitukmod siya sa iyang sitwasyon nga musulod isip boksidor.

Mahinumduman nga si Jerwin midaug niadtong Hulyo 2 sa ilang away sa ring sa Japanese nga boksidor nga si Teiru Kinoshita sa Brisbane Austria, diin iya pang napaluhod ang hapon nga kalaban sa ika pitong round. Si Ancajas adunay record nga 27 ka daug, 1 ka pildi, 1 ka tabla, ug 18 ka knock out.

Nahibaloan nga main event niadtong higayuna ang kontrobersyal nga away ni Senador Manny Pacquiao ug Jeff Horn diin napildi ang senador.