Yanong sakop sa GKK nasangyawan ug nagsangyaw na!

MATI CITY — “Kami nasangyawan ug mosangyaw usab aron modaghan pa ang mga misyonaryong disipulo ni Hesus sa mga Gagmayng Kristohanong Katilingban (GKK).” Mga pulong nga gibatbat sa napulog-unom (16) ka mga bag-ong magsasangyaw nga gipadala sa misyon niadtong Hunyo 10, 2017 sa San Nicolas de Tolentino Cathedral sa Mati.

Mga pagtulun-an bahin sa Tuig sa Parokya nga hinan-ay sa kura paroko sa San Ignacio Parish Manay, Davao Oriental Fr. Nestor B. Morata, DCM, maoy gigamit sa mga yanong magsasangyaw alang sa pagpangandam sa tahas na gisangon kanila.

Sa unang adlaw sa ilang pag-misyon niadtong Hunyo 10, gihatagan sila og panalangin “send-off blessing” ni Msgr. Edito S. Baño, DCM, ang kura paroko ug Apostolikanhong Administrador sa diyosesis sa Mati. Niadtong adlawa nagsugod sila’g hatag og pormasyon sa mga GKKs aron masabtan sa katawhan ang kahulugan sa Tuig sa Parokya ubos sa sugo sa kahugpungan sa kaobispohan sa Pilipinas (CBCP). Gipasabot sa CBCP nga ang katuyoan sa pagsaulog sa kasamtangang Tuig sa Parokya mao ang pagsubay sa siyam ka tuig nga pagpangandam sa Simbahan sa Pilipinas sa umaabot nga ikalimang sentenario sa pag-abot sa Kristiyanismo sa Pilipinas sa tuig 2021. Kahinumduman nga nadiskubre ni Fernando Magallanes ang Pilipinas niadtong Marso 16, 1521, kanus-a gitanom sa mga misyonaryong Katsila ang pagtuong Katoliko sa atong mahal nga nasud.

Unsa na ang nahitabo sa gitanom nga liso sa pagtuo? Naglambo ba kini sumala sa mga pagtulun-an ni Hesukristo? Ang napulog-unom ka mga yanong magsasangyaw kinsa boluntaryong nangalagad sa parokya nagbutyag sa ilang pangandoy inubanan sa pag-ampo nga malibot ug masangyawan nila ang 124 ka mga GKKs sa parokya sa Mati sa dili pa matapos ang tuig sa parokya karong Nobyembre. Ilahang itudlo ug ihagit ang katawhan sa Diyos sa pagsabot, paghigugma, ug pagsalmot sa mga katilingbanong kalihokan agig pagpadayag sa pagtuo ug pagsaksi sa Ginoo nga mitawag kanila. Mahimong giya sa pag-misyon ang kasamtangang tema sa tuig sa parokya: “Pagtukod sa Gagmayng Kristohanong Katilingban isip lumilihok sa Kahiusahan sa Pagsalmot ug sa Misyon.”

Niadtong Mayo 8-10, 2017, mitambong ang mga magsasangyaw sa tulo ka adlaw nga pagbansay-bansay sa mga “facilitators” (Facilitators’ training) nga gidumalahan sa mga lideres sa Association of Religious in the Diocese of Mati (ARDM). Ang pangulo, si Sr. Florita Galido, MIC, giubanan nila Fr. Antonio Nombrefia, OSA ug Sr. Rosalinda Singo, CM. Upat ka grupo ang natukod ug nagtahan sa ilang kaugalingon, panahon, talento ug bahandi aron kada sabado moduaw sa mga GKK nga gibahin-bahin nila alang sa pagsangyaw. Ang upat ka pundok gipanguluhan nila Thelma Tajore, Nila Pajo, Antonio Caro ug Erlinda Mahumot.

Dako ang pagsalig ug panghinaut sa mga yanong misyonaryong magsasangyaw nga ang Espiritu Santo maga-uban kanila sa maong sagradong tahas isip mga misyonaryong disipulo ni Kristo nga mopadayon sa Iyang misyon nga mosangyaw ug masangyawan usab. Gipasabot usab nila nga ang presensiya sa Diyos masinati sa mga hiyas sa mga GKK ug nga makakat-on usab sila. Mapasalamaton usab sila sa kaparian ug ubang mga lideres nga una nang misangyaw sa milabay nga mga katuigan. Maayong pagsangyaw…ipadayon ang misyon!

No Comments

Post A Comment