Bible Seminar gipahigayon sa SFDA-Tagakpan

Mibisita ang kongregasyon sa Daughters of St. Paul sa San Francisco de Asis Parish – Tagakpan, niadtong Hulyo 30, aron paghatag ug libreng bibliya ug paghatag usab ug seminar mahitungod sa bibliya.

Gisalmutan kini sa 122 ka mga partisipante nga mga GKK Pundok-Banay ug mga nagkalain laing mga ministriya nga nahisakop sa maong parokya.

Gisugdan sa pag-ampo ang maong seminar nga gipangulohan sa parish priest nga si Rev. Fr. Peter Fancubila, OSJ. Misunod dayon ang talk ni Sr. Rica Dalaguit.

Gihatagan ug duot ni Sr. Rica nga kitang mga Kristiyano Katoliko adunay katungdanan sa pagpa-ambit sa Pulong sa Ginoo ngadto sa atong isigkatawo.

Ingon usab ni Sr. Rica, ang paghatag ug libreng bibliya ug seminar, isa sa mga apostolado sa ilang kongregasyon. Nagabisita sila ug mga parokya, kulungan ug mga nagkalain-laing komunidad ilabina sa GKK.

Gibendisyonan ni Fr. Peter ang mga gipanghatag nga bibliya ug mihalok sa bibliya ang tanang partisipante. Pagkahuman, nanumpa ang tanan nga mohatag sila ug lima (5) o napulo (10) ka minuto sa pagbasa sa bibliya kada adlaw.

Mapasalamaton ug nalipay ang tanan sa ilang mga nakat-onan ug nadawat nga libreng bibliya. (Mary Jane Alba | SFDA SoCCom)

No Comments

Post A Comment