Buwan ng Wika gitimaan sa kasaulogan sa Misa

MATI CITY – Gisaulog sa Immaculate Heart of Mary Academy (IHMA) ang “Buwan ng Wika” pinaagi sa paggamit sa wikang Pilipino sa mga kasaulogan sa Santos nga Misa matag Biyernes sulod sa bulan sa Agosto.

Gisugdan kini niadtong Agosto 4, 2017, pinaagi sa pagtapok sa tanang mga tinun-an ug magtutudlo sa school gym alang sa paglusad sa ‘Buwan ng Wika.’ Gibutyag ni Campus Ministry Coordinator ug Grade 11 teacher Sr. Florita Galido, MIC, nga labing unang higayon kadto sa paggamit sa wikang Pilipino sa kasaulogan sa Misa, ug nasaksihan usab ang maayong partisipasyon sa tanan, sa pagpanguna sa mga Filipino classes.

Nangulo sa unang kasaulogan sa Eukaristiya si Fr. Frederick Alimbuyong sa Mission Society of the Philippines (MSP). Matud sa pari, “angayan lang nga gamiton ang ‘sariling wika’ alang sa kahiusan sa managlahing mga tribo o diyalekto sa nasud, apan wala kana magpasabot nga labing-labaw kini kaysa ubang mga lengguahe.”

Gitataw niya nga sama sa ubang mga lengguahe sa komunikasyon, dalan lamang kini sa gugma ug pagsinabtanay, ug malikayan ang panaggubat kung pahitaboon ang pakig-dayalogo una ang pinatyanay pinaagi sa hinagiban.

Sa laing bahin, ang bulan sa Agosto wala gitutok sa sariling wika lamang, kondili sa pagduaw usab sa mga rebel returnees sa Happy Home. Sumala pa ni Sr. Florita, sulod sa mga pito ka adlaw, nakahatag sila ug mga klase sa katesismo sa 16 nga mga kanhi rebelde. Ang ilang mga leksiyon naglangkob sa Pag-ampo, sa pagpasabot sa mga artikulo sa “Mituo Ako” [Apostles’ Creed], ug sa mga bahin sa Bibliya— ang karaan ug bag-ong testamento, ang pagtudlo sa mga sakramento ug sa liturhiya, labi na ang pagdawat sa lawas ug dugo ni Kristo, ug ang pagsaksi Kaniya diha sa sinserong pagbag-o ug pagpuyo sa pagtuong Katoliko. Gihimo ang Catechetical Outreach ubos sa programa sa “Ispirituhanong Paglambo” agig kabahin sa mga lakang sa pagpangandam, sa gitawag nga “half-way home,” diin kini ang pagpauli sa normal nga pagkinabuhi gikan sa pagka-rebelde isip New People’s Army (NPA). Mitambong usab ang pipila ka mga sakop sa pamilya sa rebel-returnees, sama sa ilang asawa ug mga anak.

No Comments

Post A Comment