“Higugmaa ang imong isigkatawo”

(Ika-2 nga bahin sa 12 ka bahin sa serye)

Dayag kaayo ang panaglahi sa mga tawo. Nagresulta kasagaran sa pagduda, pagselos ug pagkasina, walay pagsalig sa uban, ug sa pagkabahin-bahin, nga sa makadaghan, mag-inaway aron pagdepensa sa kaugalingon o pagdaog-daog sa uban. Mahimong samok ug gubot ang kahimtang.

Ang tawo naghimog mga balaod alang sa kahusay ug kalinaw sa pamuyo tali sa mga tawo. Nag-organisa ug kapulisan ug lain pang enforcers aron pagpatuman sa balaod. Pagkadaghan na sa mga balaod. Apan ang tawo lang gihapon ang makahatag sa katumanan sa balaod ug sa katuyuan niini. Kon dunay kagubot ug kasamok walay laing hinungdan kon dili ang tawo ra usab nga wala dawata ug tumana ang balaod.

Aron molampos ang kahiusahan alang sa kahusay ug kalinaw, kinahanglan sa tawo ang kamatuoran ug lawom nga pagsabot niini. Kinsa ang tawo? Kinsa diay ang iyang isigkatawo? Nganong higugmaon niya?

Una, dunay giila ug gihuptan ang tanang relihiyon ug pilosopiya nga gitawag nga “golden rule” Nagkanayon kini, “buhata sa uban ang buot nimong buhaton nila kanimo.” Sa lain nga pagkasulti, “ayaw buhata sa uban ang dili nimo buot buhaton nila kanimo.” Apil kini sa atong batakang pagtulun-an (Mt. 7:12). Sayon ra kaayong sabton apan dili sayon tumanon, labi na kon baliktad ang namat-an nga pagtulun-an nga nahimong pamatasan.

Sumala sa atong pagtulun-an, ang ubang mga tawo bisan sa panaglahi, mga isigkatawo sila. Duna silay gikahiusahan. Silang tanan binuhat sa Dios sa iyang dagway ug kasamahan. Silang tanan nakasala. Ug tanan gikaloy-an ug giluwas sa Dios pinaagi sa Ginoong Jesus nga atong Manunubos.

Ang Dios nagtanyag usab ug mga balaod alang sa kaluwasan sa tawo, aron mahiuli sa maayo ug husay nga relasyon sa usag-usa padulong sa pagkab-ot sa katumanan sa gimithi sa tawo dinhi sa yuta maingon man sa langit.

Dugang pa niini, ang Ginoong Jesus nagtudlo nga bisan unsa ang himoon sa tawo, bisan unsa kadako o gamay, ngadto sa labing ubos nimong isigkatawo, gihimo kini ngadto Kaniya (Mt 24:40). Sa ato pa, gihiusa ni Jesus ang iyang kaugalingon ngadto sa isigkatawo. Ang isigkatawo nahimong agianan padulong sa Ginoo.

Ang tanan tawo ug matag tawo nahimong isigkatawo nga angay higugmaon. Walay palabihon. Walay isalikway. Walay kasilagan ug dumtan. Ang paghigugma sa matag tawo, paghigugma ngadto sa Dios. Dili kini pagabulagon.

Ang matag Katoliko maisogon nga magasaksi unta pinaagi sa ilang kinabuhi niining kamatuoran ug baruganang Diosnon. Mahimo unta kitang mga gamay nga kahayag sa kalibutan. Nga mamunga unta kita ug kaayuhan ug kahiusahan taliwala sa atong gipuy-an ug gikabuhian. Ang atong pagtoong Kristohanon mahubad unta sa mahigugmaong pamuyo ngadto sa isigkatawo.

No Comments

Post A Comment