Pag-alagad ibutang sa kasingkasing sa mga bata

Dili lalim mu-train ug mga bata, apan kon matudluan ug tarong, mudako sila nga mga responsible. Ania ang usa ka istorya nga kakuhaan nato ug maayong panag-ingnan.

* * * * * *

Ang Childrens’ Choir sa parokya sa Mandug maoy nagakanta kada Dominggo, alas 4:30 sa hapon. Ing-ani ang pagsalig nga gihatag sa mga hamtong aron mahatagan ug oportunidad ang 30 ka aktibong mga bata edad 7-12.

Si Rolando Giltura, 43 anyos, ang choir coordinator sa San Alfonso Ma. De Liguori Parish, Lapanday Road, Mandug, Buhangin District, Davao City.

Tuig 2013, iyang giorganisa ang parish choir tungod sa suhestiyon ni Fr. Jeorge Angga niadtong didto pa siya na-assign.

Gisulayan niya nga magtukod ug youth choir apan wala kini nagdugay. Busa iyang giatiman and mga elementary dayon ang hayskul nga miyembro sa parokya.

Sumala niya, “mostly are senior citizens so kung di nako sugdan ni, most probably wala nay magsunod. Ang youth man gud daghan sila ug activities. Actually gisugdan nako ang youth pero dili kaayo mu-commit ba. Once na form sila (mga bata), mulahutay na sila maskin pa mag high school na sila kay nabutang na man sa ilang kasingkasing ang pag alagad maskin mudako na sila.”

Practice sa grupo kada Sabado alas 4. Kung wala “I usually require them an hour before mass, 3:30 pm,” matud pa ni Rolando.

Buhi ang Espirito Santo sa matag bata. Gani ang unang naorganisa, Grade 9 na (3rd year high school).

“Gamay pa ko ginadala ko sa akong parents sa GKK. Pag muadto ko sa church, kanta jud ang striking point sa akoa, busa akong gipaningkamutan nga makakat-on ug gitara ug piano pati banda naa pud ko sa eskwelahan kay teacher man ko,” dugang niya.

More than 20 years na siyang nagapaambit sa iyang oras ug talento sa Simbahan. Advice niya sa tanang naay talent sa pagkanta ug pagtugtog: “Mugahin ug time ug talent sa Ginoo kay diha ang dakung kalipay. After all, nanganta ang mga tawo aron ma glorify ang Ginoo. Akong kalipay nga makit-an ang mga bata nga mukanta para sa Ginoo. Unta sulayan pud sa uban,” panapos sa choir coordinator.

* * * * * *

Congratulations nimo Rolando ug aktibo nimong misis nga naa pud sa Simbahan. Happy 15th parochial fiesta San Alfonso Parish. Thank you sa tanan nga nahimong mission partner sa atong coverage niadtong Agosto 1.

Post Your Thoughts