Baguio District Athletic Meet 2017

Baguio District Athletic Meet 2017Baguio District! Home of the leaders! Cradle of champions!

Kini ang singgit isip chant sa mga batang nidula kauban ang ilang coaches, technical officials ug tanang miyembro sa sports committee sa bag ohay lang nga Baguio District Athletic Meet niadtong Setyembre 8 ug 9, 2017 sa Baguio Central Elementary School.

Ang Opening Program gisugdan sa parada libot sa Baguio Poblacion nga gisalmutan sa Malagos Elementary School, SPED Center Drum and Bugle Corps, Gumalang Elementary School Drum and Bugle Corps, mga atleta ug coaches gikan sa Unit I, Unit II, Unit III ug Unit IV kauban ang technical officials ug heads sa Sports Committee nga gipangunahan ni Sir Pelagio A. Wapaño, Jr., ang district supervisor.

Gihimo sab ang launching sa Baguio District Hymn diin ang Baguio District Administrators ang nag-compose ug nagkanta. Gisunod dayon ang hoisting of unit flag nga diin ang mga representante sa matag unit nagpataas sa flag.

Ang mga atleta nga nidula sa Palarong Pambansa 2017 nga sila James Vincent Nisnisan ug John Michael Edsa ang nanguna sa Lightning of the Urn ug sa Athletic Oath.

Pormal nga gideklara ni Sir Pelagio A. Wapaño, Jr. PSDS ang Baguio District Athletic Meet 2017. Nagsugod ang mga nagkalain-laing dula pagkahuman sa hamubong meeting ug panagsabot sa mga coaches ug technical officials.

Nahimong lingaw, kulbahinam, hapsay ug nindot ang mga dula sulod sa duha ka adlaw ilabi na ang mga championship games tungod kay dikit kaayo ang laban. Nagpakita sab ug talento ug kahanas ang mga kabataan sa ilang mga tagsa-tagsa ka mga dula. Naningkamot sila sa ilang mga dula ug gigamit ang mga natun-an panahon sa pagbansay aron makadaug. Nagpakita sila sa maayong kinaiya sama sa taas nga pasensiya, pagkadisiplinado, pagpakighigala, pagdawat sa kadaugan ug kapildihan.

Gihimo ang Closing Program pinaagi sa pagdeklara sa mga mananaug ug pagbasa sa qualified athletes nga gipangunahan ni Sir Isidro Gaitano, District PESS Coordinator.

Naghatag sab ug mensahe si Sir Pelagio A. Wapaño, Jr. sa mga kuwalipikadong atleta ug sa tanang niapil sa dula.

Gipasalamatan sa mga batang atleta ang ilang mga coaches, mga technical officials, mga ginikanan, nagluto sa ilang pagkaon sulod sa duha ka adlaw, ug sa tanang nitabang ug nagpaluyo sa maong aktibidad.

Nihatag ug inspirational message si Jonas Piore, division PESS supervisor. Matud pa niya nga siya nakakat-un pinaagi sa giya sa mga coaches, magtutudlo ug mga ginikanan. Dugang sab niya nga “pinaagi sa sports nahimong disiplinado ang mga atleta.”

Mapasalamaton niyang gi-anunsiyo nga ang Davao City ang mamahimong host sa Davao Region Athletic Association (DAVRAA) Meet 2018 ug Palarong Pambansa 2018.

Nagpasalamat siya kay Mayor Sara Duterte tungod kay gi-aprobahan ang request nga mga sports equipment and supplies sa DepEd-Division of Davao City. Kini kabahin isip pagpangandam sa mga umaabot nga dula.

Matud pa ni Sir Eric A. Amistad, District PESS Consultant sa iyang Closing Remarks, nga kinahanglan nga magpadayon sa pagbansay aron mamahimong mas maayo pang atleta. Ginaug ang mga Unit Flag isip pagtapos sa Athletic Meet.

Ang Athletic Meet ginabuhat matag tuig aron mabansay ang skills sa sports sa mga bata isip paghatag ug pagtagad ug matubag ang panginahanglan sa Multiple Intelligences sa mga kabataan. Ang ubang kabataan hawod sa sports o pahugnat sa kusog. Kini ginapahigayon aron makapili ug kwalipikadong atleta alang sa higher meets sama DAVRAA ug Palarong Pambansa.

Ang Baguio District gilangkuban sa upat ka unit nga diin adunay 14 ka mga tulunghaan. (Lorelyn May A. Lahoy Lahoy | SPCQP SoCCom)

Post Your Thoughts