O Krus, kaluwasan

SKP 2 Phase 1 sa Agdao natapos na

“O Krus, kaluwasan sa tawo nga malaumon…”

Kini ang linya sa usa ka kanta nga atong madunggan matag Estasyon sa Krus. Apan sa mga tawong sama ni Ferdinand, nga taga Brgy. Lapu-Lapu, Agdao ang Setyembre 3 dili masulub-on nga adlaw.

Naimpluwensya man siya sa kumpare niya aron musulay sa ginadili nga droga niadtong tuig 2014, dili pa dead end kaniya ang kinabuhi sa dihang misaad siya sa Diyos nga magbag-o na.

Gani, bag-o pa man nagsugod ang “Toktok Hangyo” nga programa sa gobyerno, namalandong na siya nga muundang na. Ang desisyon napakusgan pa sa dihang miapil siya sa Sagop Kinabuhi Program 2 (SKP2). Tuod, lisud ang pagtalikod, apan mas gipili niya ang magsakripisyo ug mupas an sa iyang krus kesa magpadayon sa agianang mutulod kaniya sa hinanaling kamatayon.

Walay absent ug iyang gihuman ang 17 ka semana nga psycho-spiritual seminar sukad Mayo niining tuiga sa parokya sa San Antonio, Agdao. Si Ferdinand, usa sa 32 nga Voluntary Submission for Reformation Persons nga mitambong sa culminating mass sa SKP 2 Phase 1 nga gipahigayon sa San Antonio De Padua Parish, Agdao.

Ang Director sa Archdiocesan Social Action Center (ASAC) Fr. Leonardo Dublan nag ingon nga gihimo kining Phase 1 aron matabangan ang VSR sa “pagsabot sa kaugalingon, ikaduha ang droga isip usa ka problema ug ang ikatulo ang panglantaw nga naa silay kapasidad nga maovercome ni nila ug unta di na sila mubalik. Ang Phase 2 nato mao ang skills training dayon musunod ang DOLE alang sa panginabuhian…”

Kabahin sa Phase 1 “mao ang recollection, ug exposure sa rehab ug city jail ug psycho-education program.” Kini matud pa sa trainer nga si Mr. Dennis Mabayao.

“For 14 years, naka inspire jud ang suporta sa Archdiocese, sa ASAC ug sa Agdao. This is moving up, meaning to say naa tay after care program diin makigpartner ta sa TESDA ug DOLE,” dugang niya.

Ang misa gipangulohan ni Arsobispo Romulo G. Valles, inubanan nila Fr. Leonie “Toto” España, kura paroko sa Agdao ug Fr. Leonardo “Bong” Dublan, ang Direktor sa Social Action Center sa Arkidayosis sa Davao. Sa wali ni Abp. Valles, iyang gihatagan ug duot ang karakter sa simbahan nga mao ang paghigugma ug kalooy. Matud ni Annie Maglunob, gikan sa Zone 1 GKK Sto. Nino Davao Farm, “mahinungdanon gayud iyang pagpasabot nga dili lang ang GKK ang mutabang sa kini nga kalihukan sa mga VSR kundili ang ilang pong mga kaigsoonan, kapamilya.”

Misunod ang Family Fun Day and Moving Up Ceremony didto sa Assumption College of Davao. Human sa Parade of Colors nga mao ang Red, Blue, Yellow, ug Green ang Cheering ug mga padula, gikahimut-an gayud. Gani, tungod sa donasyon nga gihatag sa mga indibidwal, misaka ang cash prizes sa Pinoylympics inubanan sa giveaways.

Pipila nga dula sa Team Building Activity mao ang Catch the Dragon’s Tail, Paluan ng Bolang Papel diin naka blindfold ang representante, dayon pagtira sa mga plastic nga mga baso gamit ang mga lastiko, Sack Race, Luksong Baka, ug uban pa. Kinaulahiang estasyon mao ang pagsinggit sa tema sa Fun Day nga “Kabag-uhan Nga Nasugdan, Ampingan ug Gabayan.” First place ang Yellow Team, dayon ang Green Team, ikatulo mao ang Blue Team, ug ang ikaupat mao ang Red Team.

Sa hapon, misunod ang Talent Fest ug dula nga Basketball ug Volleyball. Kampeon sa Basketbol ang Blue Team, samtang sa Volleyball mao ang Yellow Team. Niapil sa talent portion ang representante sa Brgy. Lapulapu, Brgy. Centro, ug Brgy. San Antonio.

Sa Moving up Ceremony gipresenta ang mga midaog ug gi presenta pod ang mga VSRs nga makadawat ug Certificate ug goods inubanan sa suporta sa partner-institutions sama sa Assumption College of Davao, San Antonio De Padua Parish, San Pedro College, Philippine National Police, Brgy. Lapulapu, Agdao Dist., ug Brgy. San Antonio Agdao Dist., Brgy. Centro Agdao Dist.

Ang Kura Paroko sa Agdao nga si Fr. Leonie España miingon nga “human niining first batch, magtapok gihapon sila, mao nang ginatawag natong after care aron nga naa gyud silay adtuan, dili sila mawala. Padayon atong paggabay kanila. Sa mga GKK Servant Leaders, daghan kaayong salamat sa pagtabang. Suportahan nato sila,” panapos niya.

Sa hiniusang pagpas-an sa krus sa kinabuhi ug way puas nga suporta ug pag ampo, mamahimong sayon ang pagbag-o sa VSR.

Ang SKP 2 mao ang tubag sa Simbahan sa daghan kaayong nagsurrender nga nagagamit ug nagatulod ug iligal nga droga, nga karon giila nga VSR persons nga resulta sa gubat batok droga nga gilunsad sa kagamgahan. (Justin & Luigi Felicia | SAP SoCCom | With report from JM Duran)

Post Your Thoughts