PSAM nagtuon ug pagluto

“A way to a man’s heart is through his stomach” Panultihon nga kaon lang sapat na. Maong dili paulahi sa pagtuon ug pagluto ang mga Parish Social Action Ministry kon PSAM sa St. Francis of Assisi La Verna, Parish.

Nagpahigayon ug PSAM Day ang mga Pangulo sa Alagad (PSA) sa St. Francis of Assisi La Verna, Parish (SFAP) niadtong Sept. 10, 2017 adlaw’ng Dominggo sa SFAP Parish Hall La Verna atol sa umaabot nga kasaulogan sa 2nd Parochial Fiesta karong Sept. 17, 2017.

Usa sa pinakadakung kalihukan sa maong selebrasyon mao ang Skills Training on Commercial Cooking nga libreng gihatag sa Dept. of Trade and Industry. Gitambongan kini sa mga PSA Gkk Coordinator sa 19 ka gkk nga sakop sa parokya. Miabot ug 36 ang partisipante tungod kay giimbita usab ang ubang membro sa mga Gagmay’ng Kristohanong Katilingban (GKK) nga nanginahanglan ug kahibalo aron magamit sa ilang panginabuhian.

Nagpasalamat ang PSAM Coordinator nga si Bro. Jun Bernaldez sa mga mitubag sa iyang panawagan uban sa panghinaut nga unta ang ilang nakat-onan mapalapnag kini sa mga GKK diin sila nahisakop, ug ingon man usab gamiton kini sa ilang panginabuhian. Dugang pa niana daku gayud ang pasalamat sa grupo kang Fr. Junar dela Victoria ang kura paroko sa maong parokya nga mihatag sa iyang panahon agig suporta sa maong kalihukan.

Matag tuig inig duol na sa kapistahan ginapahigayon ang PSAM day isip dakong panagtapok sa tanang PSAM members sa maong parokya. (Sylvia Gamaya Orbeta | SFAP SoCCom)

No Comments

Post A Comment