Serbisyong medical alang sa mga drug reformist

Setenta ka drug reformists ang nakabenepisyo sa medical mission nga gipatigayon sa Sto. Rosario Parish sa Toril di pa lamang dugay.

Ang profiling gihimo niadtong Pebrero. Sa 7 ka barangay naay 70 ka reformists ang gitabangan ug natagaan ug entry form. Ang ikaduhang phase mao ang gipatigayon nga medical mission o Pre-treatment Phase. Kini ang pagsuta sa ilang mga sakit aron maandam sila sa maong programa. Adunay drug test nga gihimo aron mahibaw-an kung nagbag-o o nagagamit pa sila ug droga.

“Nalipay ko nga sila nagbag-o na ug nisubmit na sa gobyerno kay kini para sa ilang pamilya ilabina nga ang uban naa nay mga anak,” matod ni Dr. Perla Bormillio.

“Nakatabang ug dako kini nga programa sa akong pagbag-o kay mahatagan ako ug libreng tambal,” sumala ni Flaybert, usa ka drug reformist.

Ang ikatulong phase mao ang physiological, kini naglambigit sa social ug spiritual nga kalambuan. “Nagahulat na lamang ako sa libro sa ACAD aron mapatigayon kini. Adunay 13 weeks of intervention ang ipatigayon. Naay mga activity nga makatabang kanila sa ilang paglambo sa spiritual nga kinabuhi,” pahayag sa Community Outreach Program Coordinator ug NSTP in-charge Joseph James Bernadas. Si Mr. Bernadas pud ang nagatutok niining programa.

Ang medical mission usa ka programa sa St. Peter’s College of Toril aron sa pagtabang sa pagbag-o sa mga naggamit ug droga. Adunay 3 ka phases nga gisunod sa programa: profiling, medical mission ug physiological. (Joy Ardepolla | SRP SoCCom)