Drama gipasundayag alang sa bokasyon

Nagseminarian. Nagmahal. Nag-artista! Ang mga seminarians sa relihiyosong kongregasyon sa Society of Divine Vocations (SDV), sa Holy Trinity Formation House Covered Court, Monte Maria Catalunan Grande Phase 2A nagpahigayon ug “Drama Presentation for a Cause” niadtong Sabado alas 8 sa gabii (8pm) September 23, 2017 nga gikalambigitan sa mga 38 nga seminarista ug 5 nga kaparian sa maong kongregasyon.

Tungod sa dakong gugma nila sa ilang bokasyon, ang maong presentasyon gibuhat sa tulo ka katuyuan: Una, para ibayad sa tuition sa mga seminarista nga gipaeskwela para mamahimong pari, “free-of-charge.” Ikaduha, para ma in-contact sa mga benefactors ug maghatag ug kalipay kanila nga padayong nagasuporta sa komunidad. Ikatulo, para sa kalambuan sa mga talento sa pag-akting, pagkanta, pagsayaw sa mga umaabot nga mga pari.

Ang tema sa maong drama maong ang istorya sa bokasyon sa usa ka pari, diin gisaysay pinaagi sa kanta, sa drama, sa sayaw, ang iyang kinabuhi. Gikan sa iyang pagkamasupilon na anak, hantud sa pagkamatay sa iyang amahan ug sa iyang pagbalik sa dalan nga matarong diin iyang gipakita pinaagi sa pagserbisyo sa katawhan isip usa ka pari. Sa kinalasan nanayaw ang tanang cast isip panapos sa maong drama nga mikabat ug hapit duha ka oras.

Daghang nalipay, nasubo ug nagsakit sa tiyan sa katawa sa maong drama. “Nakahilak ko, wala ko kasabot sa akong gibati; naay bag-ong kahulugan ang istorya sa drama,” ingon ni Fr. Allan Daclan, SDV. Ang mga benepaktor, nagkahiusa sa pag-ingon nga “very entertaining ang drama.” Si Victoria Jadraque, usa ka benepaktor miingon, “ako, magpadayon ko sa pagsuporta nila kay gihigugma gyud nako sila.” Luyo sa kakapuy sa mga preparasyon, nakita gihapon sa tanan ang kadasig sa mga seminarians, “tuod man nga kapoy ang mga peperasyon pero kung ikalipay sa uban akong buhaton ang tanan,” ingon ni Anthony Umbina, usa ka seminarian.

Ang tibuok mga miyembro SDV nagpasalamat sa mga tao nga mipakita ug tabang sa maong kalihukan. Gidungan kini nga selebrasyon sa ika-104th nga anibersaryo sa pagkaorden sa among Italian founder nga si Blessed Fr. Justin. (Bro. Mark Anthony Orale | Seminarian)

Holy Trinity Formation House
Monte Maria, Catalunan Grande
Tel. 299-0817