Ginikanan giawhag: Dal-on ang anak sa simbahan

San Antonio de Padua, Agdao 1st communion

Mga bata sa ilang unang kalawat.

Maskin wala iyang mama ug papa, malipayon gihapon nga miabot sa Simbahan sa San Antonio de Padua, Agdao si Cedric. Malipayon siya tungod kay niadtong buntaga sa Setyembre 16 iyang gidawat ang iyang unang kalawat kon first communion kauban ang halos 400 nga grade three ug ubang estudyante sa laing ang-ang. Nahitabo kini human sila makaapil sa recollection ug midawat sa Sakramento sa Kumpisal.

“Ang Santos nga Misa, ang Santos nga Misa ang fastest and safest way to Heaven.” Sigun ni Fr. Don Silvosa, parish vicar, sa iyang homiliya sa mga bata sa Don Julian Rodriguez Elementary School, ug sa Agdao Elementary School Extension apil ilang mga ginikanan. Ug iyang giawhag ang mga ginikanan nga mosimba na gayud ug dalaon na nila ang ilang mga anak diha sa Santos nga Misa ilabi na nga sila nakadawat na sa kalawat, sa lawas ni Kristo.

“Nalipay gyud ko kay daghan kaayong mga bata nga nangalawat,” ingon ni Precious, usa sa nakadawat sa iyang unang komunyon. Mao usab ang gibati ni Wena Jean kay ingon niya, “lami man diay ang kalawat.” Si Danielle, nga apil pud sa nakadawat sa maong sakramento miingon nga, “Mosimba na gyud ko sa Domingo uban ni Ate Janelle aron maka-kalawat ko sa lawas ni Kristo.”

Setyembre hangtod Oktubre sa matag tuig ang mga grade three sa unom ka pampublikong eskwelahan, ug duha ka pribadong eskwelahan nga anaa sa Parokya sa San Antonio de Padua modawat sa ilang unang kalawat sa lawas ug dugo ni Kristo. Aduna usab mga first communicants nga maggikan sa private non-secretarian schools, gawas sa parokya, nga moagi sa napulo ka Sabado nga catechesis una makakalawat karong Disyembre. (Elena Mozo | SADP SoCCom)

Post Your Thoughts