Happy 31st Parochial Fiesta St. Mary of the Perpetual Rosary Parish!

Ang mga Temporal ug Espiritwal nga Kinabuhi sa Parokya

Ang parokya sa St. Mary of the Perpetual Rosary padayon ug malahutayon nga nagapatigayon sa daghan niining mga proyekto alang sa iyang mga parokyano ilabi na gayud sa labing ubos, kabus ug nanginahanglan, sama sa: St. Mary Scholarship Program, Food Bank for the Poor, Visitation and Feeding sa mga edaran sa Home for the Aged, ang Mobile Blood Donation Program nga daghan na kaayo ang naka-benepisyo, ang Parish Hospitalization Assistance Program nga nakatabang sa mga GKK Servant Leaders ug mga Parish Volunteers nga adunay balati-an nga masulod sa ospital, ug padayon ang Free Medical Clinic, ang FBS screening / Cholesterol /ECG check up nga ginahimo maka-usa sa usa ka bulan.

Sulod sa ginsakupan sa parokya, duna na’y 10 ka mga GKK ang gipahigayonan og Santos nga Misa sa matag adlaw’ng Domingo, ilabi na sa mga GKKs nga halayo sa parokya. Padayon nga ginahatag ang mga basic seminars, formation seminars, mga pastoranhong pormasyon ug skills training, ang nagapadayon nga Integral Faith Formation, ug ginapatigayon usab ang mga Pre-Fiesta Assembly Catechesis nga gipangulohan sa Parish Pastoral Team, diin dinhi daghang mga espiritohanong pagtulon-an sa Simbahan ang makat-onan ug masayran sa mga miembro sa GKK. Ang St. Mary Shrine nga padayon ang proyekto sa pagpatahum niini, nahimo usab nga tagbuanan ug dapit diin ginasaulogan sa dagkong mga kalihukan sa Arkidayosis, dinhi na usab ginasaulog ang anticipated mass matag adlaw’ng Sabado. Ang kinabuhi sa pagsimba gikinahanglan gayud aron nga molambo ang espiritwal nga aspeto sa katawhan sa Dios, ug tungod niini sa paninguha sa kura paroko Fr. Jesus Samaniego, dunay mga GKK nga ginamisahan maka-usa sa usa ka bulan sa adlaw’ng Sabado.

Hamubong Pagbalik Lantaw

Sa pagtukod sa parokya sa St. Mary of the Perpetual Rosary niadtong Mayo 31, 1987 aduna na’y mga kapilya nagpalibot sa nahisakupan sa maong parokya. Halapad ang lugar nga sakop niini, gikan sa barangay Indangan, barangay Communal, mga bahin sa barangay Buhangin, ug ngadto sa barangay Tigatto.

Sa tuig 1987 ang parokya sa St. Mary duna lama’y 22 ka orihinal nga GKKs. Sulod sa pagdagan sa mga katuigan, dunay mga GKK nga namugna og kini nahadugang sa parokya. Sa tuig 2006 ngadto sa tuig 2012, sa kapanahonan nga si Rev. Fr. Pedro Lamata ang kura paroko, ang parokya aduna na’y 65 ka mga sakop nga GKK. Apan ang parokya sa St.Mary nanganak og laing parokya, ug mao kini ang parokya sa Birhen Medalla Milagrosa sa barangay Indangan. Busa tungod sa maong katukuran, 14 ka mga GKKs nga kanhi sakop sa St. Mary nahisakop na sa bag-ong parokya nga Birhen Medalla Milagrosa.

Sa kasamtangang panahon nga si Rev. Fr. Jesus Samaniego na ang kura paroko, padayong milambo ug mitubo ang parokya kay aduna may mga bag-ong GKK ang natukod. Ang parokya karon sa St. Mary adunay 55 ka aktibong GKK, walay labot na niini ang usa ka GKK sa Birhen sa Fatima-Pag-ibig nga nahisakop na sa parokya sa St. Francis sa La Verna Homes.

* * * * * *

Mensahe

Mga minahal namong Parokyano,

Malipayong Pista kaninyong tanan!

Karong tuiga mao ang atong Ika-31 ka tuig nga kapistahan sa parokya ug katapusan nga kapistahan diin ako uban kaninyo. Busa, ako kaninyo nagapasalamat tungod sa inyong walay puas nga pagsuporta sa dagkong mga proyekto nga atong gilusad dinhi sa atong parokya.

Nanghinaut ako nga uban ni Mama Mary, padayon kamong mahiusa ug magsuportahay diha sa usag-usa, aron labi pang molambo ang atong parokya ug daghan pang mga kabus ug ubos natong mga igsoon ang atong katabangan tungod sa inyong kamanggihatagon.

Niining Tuig sa Parokya padayon natong duolon ug adtoon ang tanang sakop natong mga GKK aron nga mapahibalo ug mag-awhag kanila nga magtagad ug magpakabana sa kinabuhi ug misyon sa Simbahan. Dili lamang nga kaalibyohan nato ang material nga aspeto sa atong mga igsoon, apan usab ang pagsanong sa panawagan sa atong mahal nga Inahan didto sa Fatima nga mao ang: pag-ampo sa rosaryo alang sa kalinaw, paghimo’g paghinulsol aron mausab ang makasasala, ug mapakaylap ang pagdebosyon sa iyang Putli nga Kasingkasing. Kining tanan dili sayon, apan tungod sa grasya sa Dios ug sa pagpangama ni Birhen Maria atong patron, madasigon nato kining matuman. Ang tanang paningkamot nagsugod sa atong kaugalingon, busa ipakita nato ang atong kahiusa, tungod sa atong gugma sa Dios ug sa atong isigkaingon.

VIVA HESUS!! VIVA MARIA!!

Kaninyo kami mapasalamaton,

Rev. Fr. Jesus H. Samaniego
Msgr. Maximo M. Sarno