Serye sa mga pista nga gisaulog sa Setyembre

MATI CITY — Human dayon sa panagtigom sa upat ka mga eklesiastikong hurisdisyon sa rehiyon sa Davao nga mao ang Davao, Digos, Tagum, Mati kon DADITAMA niadtong 4-5 Sept. 2017 didto sa Oriental Prince Suites and Arcade sa siyudad sa Mati, gipahigayon ang sunod-sunod nga mga piyesta parokyal: una sa San Nicolas de Tolentino sa Boston (Sept 6), ikaduha sa Immaculada Concepcion de Maria sa Baganga (Sept 8), ikatulo sa San Nicolas de Tolentino sa Mati, ug katapusan sa San Pedro Claver sa Tarragona, kun asa giapil usab ang pagbendita sa bag-ong simbahan. Nasinati ang presensiya ni Bishop Emeritus Patricio H. Alo, D.D. sa tanang mga kasaulogan sa fiesta Masses, kauban usab ang Kura Paruko sa lugar ug ang Apostolic Administrator Msgr. Edito S. Baño. Ang kasamtangang mga kura mao sila si Fr. Orveil P. Andrade sa Boston, Fr. Joel L. Vidal sa Baganga, Msgr. Baño sa Mati, ug Fr. Edilberto R. Mahinay sa Tarragona. Sa Mati ug Tarragona nag-preside si Davao Archbishop Romulo G. Valles, D.D. inubanan ni Bp. Alo ug sa apostolikanhong administrador.

Nasaksihan ang tradisyunal nga mga paghikay alang sa mas daghan pang dumuduong nga buot mosalmot sa mga debosyon ug moduyog sa kalipay sa katawhan.

Nagpabilin ang tema nga gikutlo sa kasamtangang tuig sa parokya: “Tuig sa Parokya isip Mag-inambitay nga Katilingban.” Nagsilbi kini nga giya sa mga apostolado ug ubang managlahing pundok sa pagpalig-on sa nagkadaiyang mga katilingban alang sa paglig-on sa simbahan o parokya. Wala magsapayan ang mga pari diha sa ilang pagwali, sa pagdasig sa katawhan sa mapadayunong pagpalambo sa ilahang kinabuhing ispirituhanon, labi na sa mga banay o panimalay.

Lakip sa mga pag-ampo ang pag-angkon sa kalinaw ug kahiusahan, ug pagtapos sa panaggubat. Gipahigayon usab ang mga dula sa sports ug matag gabii nga kalingawan nga gipaluyuhan sa gikatakdang mga sponsors.

Post Your Thoughts