52nd anniversary sa Kasaulogan sa Pulong-Pangulo sa Liturhiya

Valles: ‘Palanggaon ang Gasa’

Batan-on, estudyante sa grade 10, 17 anyos, si Robert Tudlasan ang pinakabata sa kapin 3,000 nga miapil sa ika-52 nga tuig sa Pangulo sa Liturhiya (PSL) niadtong Domingo, Nobyembre 19, sa Dennis A. Uy-St. Francis Xavier Regional Major Seminary (REMASE). Si Tudlasan nga gikan sa GKK Birhen Dolorosa sa San Roque Parish, Malabog miangkon nga ang iyang lolo ang nagdani kaniya sa pagserbisyo.

“Ang akong lolo man gud ang nakapadani kanako, kay usa man pud siya ka PSL. Ganahan noon ko ug mas nadasig ko karon tungod ani nga selebrasyon,” matud ni Tudlasan.

Si Brod. Jesus Las Marias sa GKK Santa Marta, San Isidro Labrador Parish, Catalunan Grande, 43 ka tuig na isip PSL. Sekreto sa paglahutay iyang giingon, “gusto lang nako moserbisyo mintras may kinabuhi pa.” Sa pangidaron nga 67 anyos, padayon siyang nagtrabaho sa REMASE isip utility.

Duyog sa tema sa selebrasyon, “PSL, Gasa sa Panaghiusa Diha sa Parokya,” nagsugod ang kasaulogan sa usa ka pagpaambit sa pari nga kanhing PSL gikan sa Toril sulod sa tuig 1987-2002, Fr. Jeorge Angga.

“Bulahan ang PSL nga sa iyang kamatayon nagpabiling nangalagad sa Ginoo,” miingon siya. Dili kuno ang tawong nagaserbisyo ang nagpili sa Ginoo, apan ang Ginoo ang nagbuot nga siya tawagon. Mensahe niya sa tanan nga mag-ampo sa Santos nga Rosaryo, magbasa ug Bibliya, ug mangumpisal “aron magpabilin mo sa state of grace.”

Importante sab kuno ang padayon nga pormasyon ug pagbag-o sa kaugalingon. “Mag-ampo, sama sa atong himuon taud-taud. Ang misa ang kinatas-ang matang sa pag-ampo,” panapos ni Fr. Angga.

Human sa input, misunod ang misa diin sentro sa wali ni Arsobispo Romulo G. Valles, D.D. ang kamahinungdanong sa papel sa PSL sa panaghiusa sa parokya ug uban pang kristohanong pundok.

Iyang gipahinumdoman ang mga kaabag sa pari nga himuong makanunayon ang pag-alagad. “Unsay gihatag kanimo, pagamit sa gasa alang kanimo.”

Di sad daw kalimtan nga ang kinabuhi sa usa ka PSL angay nga kapanaminan, “ayaw kalimti ang power of personal witness…remember Jesus, our memory of Jesus,” si Valles miingon.

Sa katapusan, gihagit niya ang matag usa nga i-ampo ang ilang kapikas sa kinabuhi ug ang ilang mga anak. “Pray for your wife and children who support you”, matud niya.

Bibo ang tanan sa pagpangaon sa paniudto, uban sa Our Lady of Lourdes PSL band nga maoy nagpalipay pinaagi sa ilang musika.

Si Bro. Reynaldo Diaz gikan sa St. Jude Parish, Malvar, Davao City, nagpaambit sa iyang kasinatian isip PSL. Iyang gisaysay nga bag-o pa man siya nahimong PSL, bisyo ang iyang giatiman sa una. Apan matud pa niya, sa iyang paghatag sa tibuok niyang kinabuhi sa Diyos, nakadawat siya ug mga milagro nga maoy nakapabag-o kaniya. Ang iyang misis sa karon, nagserbisyo na sab sama niya.

Ang Director sa Archdiocesan Liturgical Center nga si Fr. Joel C. Caasi nagpasalamat sa tanan. Siya nagbilin ug mensahe: “Be united not only to one another, but above all to God.”

Ang KSP-PSL nagsugod tuig 1965 sa misyonerong pari gikan Canada (PME Fathers) sa usa ka kapilya sa Tuban, Sta. Cruz, Davao del Sur nga kaniadto sakop pa sa Arkidayosis sa Dabaw. Ang mga PSL ang instrumento sa pagpanguna sa kasaulogan sa Pulong aron sa pagpalig-on sa mga Gagmay’ng Kristohanong Katilingban. (Cheryl A. Vilog | Edgar V. Floresca)

Post Your Thoughts