Matapos ang Kalibutan, Segurado? (Part 2)

(Kataposang bahin sa duha)

Pagtulun-an:
Maayong motuo kita sa mga pulong ni Jesus:

“Pagbantay kamo ug ayaw kamo palimbong kay daghan ang moanhi sa akong ngalan nga mag-ingon,’Ako mao si Cristo!’ ug moingon usab,’Miabot na ang panahon!’ Apan ayaw sila tuohi. Ayaw kamo kahadlok kon makadungog kamog mga gubat ug kagubot kay kining mga butanga kinahanglan nga mahitabo gayud pag-una apan wala kini magpasabot nga mao na kini ang kataposan.”(Luke 21:8-9)

Sa laing higayon si Jesus miingon kang Juan: ‘Apan walay tawo nga nasayod kanus-a moabot kadtong adlawa ug taknaa, bisan ang mga anghel sa langit ug bisan gani ang Anak, kondili ang Amahan lamang.’(Matt 24:36)

Kon sabton lang nato ang ebanghelyo, dili kita mag-usik sa usa ka minuto nga pagkabalaka ug paghigwaos nianang mga Nostradamus ug ang iyang mga kauban. Nagtuo ba diay kamo nga mas labing maalam ang nagkalain-laing mga Nostradamus kay sa mga anghel ug sa Anak sa Dios?

Tinuod, gihisgotan ni Jesus kining mga kalamidad, apan halayo sa pagsabot sa bakakong mga propeta. Gani, sa matag balita nga maadunay kusog nga linog, tsunami o makahahadlok nga pagbuto sa bulkan, balita nga motuyok sa tibuok kalibutan, ang mga “bakakong manalagna” adunay rason nga moingon, “ang katapusan haduol na! Gibuhat kini sa mainiton ug masaligong mga bakakong propeta.”

Kon adunay moulbo nga gubat, ilabina sa Middle East diin ang Israel nahilambigit, madunggan na usab nato sila nga moingon, “Tan-awa, mao kana ang pagsugod sa ‘Armagedon.”

Diha sa Matthew 24:6-8, atong mabasahan,”Makabati kamo’g mga gubat sa duol ninyo ug mga balita mahitungod sa mga gubat sa halayo apan ayaw kamo’g kabalaka. Kining mga butanga kinahanglang mahitabo apan wala kini magpasabot nga mao na ang kataposan. Moggubat ang mga nasud ug mag-away ang mga gingharian. May mga kagutom ug mga linog sa tanang dapit. Kining tanan sinugdanan paalang sa mga kasakit nga daw sama sa nagbati nga inahan.”

Namatikdan ba nato, nga sa nangaging panahon, nahitabo ang labing makalilisang nga pagbuto sa bulkan, makahahadlok nga linog nga atong nasinati sa karon. Ang katawhan nakigbatok pinaagi sa makalilisang nga gubat sukad pa sa sinugdanan sa kasaysayan sa tawo, apan dili kini ang mga timaan nga ang kataposan haduol na, sumala sa gisulti ni Jesus.

Gubat, linog, kalamidad nga gikan sa kabuhatan, nga sa kanunay mokuha sa kinabuhi sa mga tawo, nagpahinumdom kanato nga ang atong kinabuhi ning kalibutan, lumalabay lamang. Usa ka kinabuhing temporario! Kay dili man kita mabuhi ning kalibutan hangtod sa hangtod. Ang atong pagbiya alang sa walay kataposang kinabuhi, mao ang atong kaugalingnon nga ‘kataposan sa kalibutan’ ug kini moabot sa hinanali ug wala paabota, sama sa linog. Mao man gani nga giingnan kita nga mangandam, dili lang makausa o makaduha nga pahinumdom ni Jesus diha sa Mga Ebanghelyo. (Sr. Rica Dalaguit, fsp)

No Comments

Post A Comment