Batan-on, gingharian, byuda

Atol sa ika-8 nga kapistahan sa Our Lady of Miraculous Medal, Parish, Indangan, Davao City, ang atong Arsobispo Romulo G. Valles, D.D. mihatag sa iyang tulo ka puntos sa mga parokyano.

Una – Ang importansya sa debosyon sa mga batan-on kang Maria.
Ang mga batan-on sumala pa ni Abp. Valles ‘tech-ie’ na kuno, ‘trendy’, dili paulahi sa mga bag-ong gawas nga mga ‘gadgets’ sama sa smartphones ug uban pa. Ug iyahang gihagit ang mga ginikanan nga bantayan ang ilang mga anak ug higugmaon kini sama sa pagpangga ni Maria sa ilang mga anak.

Ikaduha – Ang pagpakaylap sa gingharian sa Diyos.
Ang pagtoo ug pagmahal sa Simbahan sama sa pagpangandoy sa pagmugna ug dako nga simbahan alang sa pagpakaylap sa gingharian sa Diyos. “Okasyon kini nga ang naa sa ilawom sa atong pagtuo mao ang atong pagmahal sa simbahan. Mapakita nato kini pinaagi sa pagtukod ug balay-ampoanan alang sa pinalangga nga katawhan sa Diyos ug pinalangga nga katawhan ni Maria,” sumala ni Abp. Valles.

Ikatulo – Ang halad sa byuda
Ang duha ka dako nga gihalad sa byuda maoy nakapahimuot sa Diyos kay bisan pa sa iyang kakabus , siya mihatag sa iyang gikabuhian. “Busa miingon ang Ginoo, maayo ang mohatag pero ipakita ninyo nga kamo gamay lang ug bisan sa inyong kagamay kanunay kitang mohatag sa Ginoo,” panapos ni Abp. Valles.