Giulan sa kalipay ang Davao City Jail

Disyembre 22 ang giingon nga landfall sa severe tropical storm Vinta sa pila ka lugar sa Mindanao apil diri sa Davao Region. Nakasinati sa pag-ulan ang siyudad sa Davao sukad anang gabii sa Disyembre 21. Rason aron magpabilin sa sulod sa panimalay ang mga tawo. Apan, alang sa pipila ka mga tawo diri sa Davao City kini ang buntag alang sa pagbisita sa mga inmates sa Davao City Jail.

Bitbit ang ilang mga gasa, milarga padulong sa city jail ang pundok sa mga Lay Ministers ug Couples for Christ, nga gipangulohan nila Doming Lopez ug Boyet Miguel, sa parokya sa San Antonio de Padua, Agdao aron sa pagdala og kalipay sa mga kaigsoonan nga anaa karon didto pinaagi sa ilang presensya ug pagtagad ilabi na karong panahon sa Adbyento ug Pasko.

Gitagbo sila nga mahinangpon sa mga inmates diha sa ilang kapilya sa Sto. Niño Chapel. Didto, gisalohan sa mga bisita ug inmates ang pag-ampo ug pagdayeg sa Ginoo diha sa mga awit. Sa nahitabong programa, malipayong mipasundayag ang mga inmates sa ilang talento sa pagsayaw ug pagkanta. Ang mga Lay Ministers sa ilang bahin mihalad og mga awit.

Nag-abot-abot ang mga bisita nga tanan buot magdala og kalipay. Anaa ang Couples for Christ North-C ug Singles for Christ nga gikan sa Toril ug Tibungco. Miabot usab ang head sa City Anti-drug Abuse Committee, Mikee Aportadera, aron sa paghatag og mga bag-ong yellow t-shirts ug mensahe sa paglaum diha sa local government ug labaw sa tanan sa grasya sa Ginoo.

“Kasadya ning taknaa”, ang kanta nga gipalanog sa choir sa inmates. Tinuod gayud ang kasadya sa takna nga gisalohan sa tanan uban sa mga dekolores nga parol nga tanan hinimo sa mga inmates nga nagbitay gawas sa kapilya ug sa mga pahiyom ug katawa. “Pagka-nindot gayud sa maayong buhat”, ang tubag nga kanta sa mga lay ministers sa San Antonio de Padua.

Mao kini ang grasya sa Dios Amahan alang sa iyang mga pinalanggang anak sa city jail. (Elena Mozo | SADP SoCCom)

Post Your Thoughts