GSL naglingaw sa Family Day

Ang gihimong Family Day ug GKK Servant Leaders Renewal ug Sending Forth nga gipahigayon niadtong Disyembre 30, 2017 sa St. Francis of Assisi La Verna gisugdan sa misa alas 9:00 sa buntag. Sulod sa maong misa gipahigayon ang GKK Servant Leaders Renewal ug Sending Forth. Nagsul-ob ug puti ang mga lideres timailhan nga sila mga GSL.

Human sa misa, nangadto sila sa Covered Court sa Phase 2 sa La Verna Subd. diin didto gipahigayon ang Family Day. Nagdala ug mga pagkaon ang matag GKK ug kini giplastar sa ilang tagsa tagsa ka lamesa nga giandam matag GKK pero kining tanan wala mahitabo nga kanya kanya ang pagplastar kondili nakurat ang tanan sa pagpahibalo sa kura paroko nga si Fr. Junar dela Victoria nga otrohon ang naandan nga pamaagi.

Matud pa ni Fr. Junar ang pasko usa ka kahigayonan sa pag-inambitay, busa iyang giawhag ang tanan nga dalhon sa tunga ang tanang pagkaon diin ang tanan pwede mokuha ug moambit sa mga pagkaon nga anaa sa lamesa. Bibo kaayo panahon sa pagpangaon ug nalipay ang tanang mga nanambong kay nasinati gayud ang pag inambitay sa matag-usa.

Nagpresent ang mga GKK/sona ug Christmas Chorals. Agi ug pahalipay usab sa parokya ngadto sa mga lideres/membro nga nanambong daghang mga papremyo nga gihatag. Daghan ang mga nakadawat ug malipayon kaayo nga nanguli ang matag usa. (Sylvia Gamaya Orbeta | Photos by: Angel Mae Beldua Jolito)