Ika-13 nga Kapistahan sa Sagrada Pamilya

Una pa gisaulog ang ika-13 nga kapistahan sa parokya, ang mga parokyano sa Holy Family Parish sa Brgy. Baliok, nangandam pinaagi sa pagtambong sa novena mass sa 5:30 sa buntag sugod niadtong Disyembre 21 hangtod Disyembre 29. Ang matag novena adunay tema nga nakatabang sa pagpalaum sa pag-ila sa Sagrada Pamilya.

Sa disperas sa pista, adunay gipahigayon nga gift giving ug feeding sa parokya sugod alas 8 sa buntag hangtod12 sa udto. Niining tungura, ang mga Pangulo Sa Alagad (PSA) nagdala ug mga bata gikan sa ilang GKK nga maoy recipient sa gift-giving ug feeding.

Dungan sa gift-giving ug feeding, gipahigayon ang basketball sa mga GKK Servant Leaders. Sa maong dula, nidaug isip first place ang mga GSLs sa Christian Community 5 nga maoy nakigdula sa Davao Clergy niadtong adlaw sa pista kon diin ang grupo sa mga kaparian maoy nidaug.

Sa alas 4:00 sa hapon dala ang ilang patron, nagtapok pag-usab ang mga parokyano gikan sa lain-laing GKK alang sa usa ka prusisyon. Gisubay sa maong prusisyon, ang mga nag-unang kadalanan mga nahisakop sa parokya.

Sa adlaw sa pista, Disyembre 3O, nagsugod kini sa usa ka santos nga misa sa 5:30 sa buntag. Usa sa mga pinakadakong aktibidad atol sa pista mao ang Kasalan sa Parokya nga gipangandaman sa mga miyembro sa Pangulo Sa Katilingbanong Banay (PSKB). Ang maong solemnidad sa kaminyuon gipanguluhan ni Fr.Ricky Peñalosa, kura paroko nga nihagit sa mga magtiayong nidawat sa sakramento sa kaminyuon nga magpuyo isip lig-ong banay kauban ang Dios sama sa Sagrada Pamilya.

Human sa Kasalan, nag-iya-iya ug pangita ang mga bata ug ang mga hamtong sa mga gitaguang itlog palibot sa simbahan. Sila nisalmot sa egg hunting nga giandam sa Finance Committee. Gisunod pod ang pipila pang dula sama sa kadang-kadang, palayok ug pabitiin. Ang mga dula giandam sa mga miyembro sa lain-laing ministriya. Duna poy mga booths sama sa photobooth, Fruit Stand, Videoke, Kakanin ug uban pa. Ang mga booths, gimando sa matag Christian Community.

Sa alas 5:30 sa hapon gitambu ngan sa mga parokyano ang Pontifical Mass nga gipanguluhan sa Halangdong Arsobispo sa Davao ug Pangulo sa CBCP, Archbishop Romulo G. Valles, D.D. Iyang gipadayag ang iyang dakong kalipay nga nasinati pag-abot niya sa parokya tungod sa mga parol palibot sa simbahan nga naghatag ug kahayag. Iyang gipasidunggan ang kaanindot sa Belen nga nagsimbolo sa Sagrada Pamilya. Siya usab naghagit sa tanan nga sama kang Jesus, Maria ug Jose kita mahimong kahayag sa mga pamilyang anaa sa kangitngit tungod sa mga pagsulay ug sa dili maayong kasinatian sama sa mga nabiktima sa sunog ug baha.

Nagtapok usab ang mga parokya sa hiniusang panihapon paghuman sa misa. Kini gisundan sa Parish Cultural Night ug Grand Draw sa Fiesta Raffle Bonanza.

Sa maong okasyon, gitagaan ug pasidungog ang mga GSL nga nakaserbisyo na ug 10 o kapin ka tuig sa ilang GKK. Sila gitagaan ug Certificate of Appreciation nga pinirmahan sa kura-paroko.

Sa kinatibuk-an, nahimong malampuson ang mga aktibidad sa parokya atol sa ika-13 nga kapisthan. Kining tanan tungod sa pagtibangay sa mga miyembo komitiba nga gitahasan sa nagkalahi-lahing buluhaton. Sa katapusan, kinasing-kasing nga gipasalamatan sa PaFCor (Parish-Finance and Coordinators) ang tanang GSKs ug mga parokyano sa Sagrada Pamilya sa ilang pagpaambit sa ug panahon ug suporta dili lamang sa panahon sa kapistahan kon dili sa tanang mga aktibidad nga gilatid sa tibuok tuig.

Viva, Sagrada Pamilya! (Flor Arellano-Deloria)

Post Your Thoughts