Kinahanglan ba ta og pederalismo aron matarong ang kalsada?

Di pa lamang dugay, nakabalik na usab ako sa usa sa pinakalayo nga misyon sa diyosesis. Ang Sto. Niño Mission Station sa Barangay Nuing, Jose Abad Santos, Davao Occidental. Dako nako ug ilang kalipay nga nakahinagbo na usab kami atol sa ilang ika-16 nga kapistahan sa Santo Niño. Maayo ang panahon. Linaw ang dagat ug wala mag-ulan og kusog ug dugay. Mao nga nakaabot ra jud kami sa maong dapit. Pit Señor!

Ang mga una nakong pagadto sa Nuing, mobiyahe pa jud kami sa dagat gikan sa Margus, Sarangani o sa Balangonan, Davao del Sur. Usahay wala ko magmalampuson kay dili itugot sa panahon. Gawas pa niana, wala pay klarong dalan alang sa four-wheel nga sakayan. Busa, sa pipila ka higayon habal-habal ang sakyan namo.

Usa gani ka higayon, aron lang makaabot ko didto, dunay mga nagmotorbike nga naggiya kanamo nagsakay og pick-up ug mitungas sa bukid ug mitabok ug misubay sa kaumahan ug kasapaan. Walay dalan! Mitabok mi sa bukid sa Sarangani ug Davao del Sur. Gikan sa kasadpan ngadto sa silangang dapit, didto sa Nuing.

Hangtod karon, mahibulong pa gihapon ako sa unsang paagi namo kadto nahimo.

Dugay na kato nga panahon. Karon duna nay giabling dalan. Galing lang, putol pa. Motuyok pa kami agi sa Gensan sa habagatang dapit sa lalawigan. Ug haskang gubaa, lapoka kung mag ulan. Dagko kaayo og bangag-bangag sa dalan tungod sa mga dagko kaayong truck dikarga nga sige agi sa taginit o tag ulan. Murag sungkaan. Mao na ni ang kasamtangang kahimtang sa pagadto ug paingon sa mga tawo sa among mga kadalanan didto.

Hilabihang paita ang maong kahimtang sa mga kabataan ug mga masakiton ug mga tigulang nga kinahanglan mobiyahe. Kapin na ni nga mga 10 ka tuig. Pastilan no! Panahon pa ni Pres. Arroyo, Aquino ug bisan karon sa panahon ni Pres. Duterte nga taga Mindanao ug taga Davao pa jud.

Naa koy naistorya nga lokal nga politiko nga mihatag nako og katin-awan nganong naingon man niini ang kahimtang sa mga kalsada, bisan mga national road, sa among lalawigan.

Samtang sa laing dapit naga 6 lanes na ang hi-way, ang dinhi sa kasuok-suokan wala pa jud intawon natarong. Hinay kaayo ang pag abante sa kauswagan. Matod pa niya, naa na apan wala pa gihapon. Himoon na unta, mababagan o maundang pa jud. Sige lang og sugod. Mao nga tinuod gayod ning komedya sa mga tawo bahin sa DPWH. Daghang proyekto, walay na human. Tinuod gayod diay ning gidudahan sa mga tawo nga politika sa lokal nga kaggamhanan ang responsable sa maong kahimtang. Tungod niining pamolitika, dili kaayo epektibo ang serbisyo publiko sa panggamhanan.

Kitang nagabiyahe sa kadalanan, matandi gayod nato ang kalidad sa mga prohekto sa dalan sa lainlain nga probinsiya. Labi na, kon nakagawas sa laing nasud. Busa, kabalo kita nga kung ayohon og tarongon gayod pagbuhat, nindot kaayo ang resulta oy! Unya ang mga nagabiyahe dako kaayo og pagdayeg. Apan pag abot sa atong dapit, magsige og panaway. Makasala na lang hinoon kita.

Akong gisulatan ang DPWH. Ako silang giingnan nga iampo nako sila aron karong 2018 masumpay na ang dalan sa lalawigan sa Davao Occidental ug magmahapsay na ang pagbiyahe sa mga labing ubos natong kaigsoonan nga bisan unsang klaseng gobiyerno, federal man o kung unsa, basta maserbisyohan ra jud sila og tarong. O Señor Santo Niño, ayoha ug tabangi kami.

Post Your Thoughts