SFX seminarista nagpasalamat

Unang miabot ang walo ka Theology 2 seminarians sa St. Francis Xavier Major Seminary, Catalunan Grande, Davao City, sa Parokya sa San Antonio dePadua, Agdao, niadtong Hulyo 19, 2017. Gidawat sila sa mga PSK sa 8 ka sona diha sa usa ka hamubong pag-ila-ila ug panagtagbo diha sa St. Mary’s Hall sa maong parokya. Ug nagsugod gikan didto ang panagtagbo sa mga seminarians ug mga GKK kung diin sila maghimo sa ilang pastoral exposure.

Milabay ang 6 ka bulan ug karon nia na ang mga seminarians sa paghalad sa mga Misa Pasalamat diha sa mga GKK kung diin sila miaabot, misaka, miila-ila ug nagpa-ila, misinati sa kinabuhi sa GKK, ug mipasalamat kanila sa tanang kasinatian nga ilang giambitan.

Diha sa sona 9 kung diin gisaulog ang katapusang Misa Pasalamat sa mga seminarians ug atol sa kapistahan ni Sr. Sto. Niño niadtong gabii sa Enero 20, gitultol ang San Pedro GKK sa mensahe sa paglaum nga gikan sa Ebanghelyo ni San Marcos. Pinaagi ni Padre Warren Maratas, Assistant Director sa St. Francis Xavier Seminary, ilang nasinati ang mensahe ni Kristo diha sa Ebanghelyo, nga ang “nahimong babag mao ang nahimong tubag; ang nahimong nakapaluya mao ang nahimong nakapadasig.” Ang mga tinun-an ni Kristo mao ang nahimong babag sa pagduol sa mga bata, apan sila usab ang nahimong paagi sa pagduol nula kay Kristo.

“Ayaw paglantaw sa mga lideres nga nahimong babag sa imong pagduol sa kapilya, sa Simbahan,” ingon ni Fr. Warren Maratas. “Si Jesus gayud ang lantawon aron molambo ta, aron molahutay ta.”

Makig-uban pa ang mga seminarians sa mga GKK nga ilang gisak-an hangtod Pebrero niining tuiga. Motambong pa ang mga GKK sa Pastoral Day didto sa Seminaryo sa Catalunan Grande karong Pebrero 25.

Midawat ang mga GKK sa mga seminarians nga walay pagpili ug paghunahuna. Midawat sila sa grasya sa Dios alang kanila.

Daghang salamat St. Francis Xavier Major Seminary sa inyong pagdala kanila, kanamo. (Elena Corazon Mozo | SAP Agdao)

No Comments

Post A Comment