Ipatigbabaw ang kalipay!

Easter Sunday
Acts 10:34, 37-43 / Ps 118:1-2, 16-17, 22-23 / Col 3:1-4 / John 20:1-9

Aduna bay hinungdan nga kita malipay? Malipay pa ba kita sa kahimtang nga magpuyo lang ta sa balay, nga dili ta makatambong aron mosimba didto sa parokya o kapilya, nga namiligro pa kita mataptan sa sakit nga COVID 19?

Sa mga mata sa pagtoo adunay daghang hinungdan nga kita malipay. Malipay kita kay ang buhing Dios naghimo og daghang maayong butang ug nag-ayo sa mga masakiton. Diha sa mga Buhat sa mga Apostoles sa unang pagbasa, ang mga tinun-an ni Kristo misaksi sa iyang mga milagro sa pag-ayo sa mga masakiton ug pagluwas sa mga naglisod.

Ang Salmo nagkanayon, “Mao kini ang adlaw nga gihimo sa Ginoo, maglipay kita ug magsadya!” Gihimo sa Ginoo ang mga adlaw nga ang matag pamilya mag-uban sa pag-ampo. Siya naghatag sa mga adlaw nga kita makapahulay sa kapaspas sa daghan natong buluhaton. Siya naghimo sa mga adlaw nga momenus ang trapiko ug polusyon. Siya naghimo niining mga adlaw nga maatiman ang atong panimalay.

Maglipay kita kay sama sa mga taga-Colosas, nakahuna-huna kita sa mga butang langitnon ug dili lamang yutan-on taliwala ning panahon sa kwarentinas. Malipay kita nga maninguha labaw pa niining kalibotana nga madutlan sa lawasnong sakit bisan pa sa gahum, kwarta, estado o kahibalo nga atong naangkon.

Malipay kita kay sama sa mga tinun-an diha sa Ebanghelyo, nangita kita kon asa na ang Dios. Niining kalibotan nga gisakit sa trahedya, sama kanila, nagdagan kita nga makigkita sa Manluluwas. Bisan dili pa nato masabtan ug matugkad ang tanan, kita misalig, milaum ug mitoo nga human niining tanan, malingkawas kita ug moabot kanato ang kaayohan. Sama sa giingon ni Papa Francisco: “Taliwala sa atong pagpalayo sa usag-usa, diha sa atong pag-agwanta sa paglikay sa panagtapok, ug sa atong pagsinati sa pagkahanaw sa daghang butang, mamati kita pag-usab sa pagsangyaw nga nagluwas kanato: nabanhaw siya ug buhi uban kanato.” Busa paglipay ug pagmaya kay ang Dios nabanhaw. Siya buhi uban kanato.