Bulawanong Hubileyo sa GKK San Roque Kialaw, Malabog: 50 Ka Tuig sa Pagtuo, Panaghiusa ug Gugma

Niadtong ika-23 sa Agosto tuig 2025, ang katilingban sa GKK Sr. San Roque, Kialaw naghiusa sa usa ka matahum nga pagsaulog sa Ika-50 nga kapistahan — usa ka Bulawanong Jubileo nga puno sa kalipay, pagpasalamat, ug pagtuo ubos sa tema nga “Uban ni Sr. San Roque: Bulawanong Hubileyo Gisaulog ning Katilingban nga Nagapanaw, nga Puno sa Panaghiusa ug Gugma,” ang tibuok komunidad misanong sa makalilipay ug makahulugang kasaulogan, diin gibati gayud ang espiritu sa panaghiusa ug espiritwal nga panaw sa tibuok limang dekada.

Ang GKK Sr. San Roque, Kialaw nagsugod sa 1975 isip gamay nga grupo sa pag-ampo, ug karon mitubo kini isip buhi nga katilingban sa pagtuo. Kini nga pista usa ka testamento sa pagpaningkamot ug panaghiusa isip katawhan nga malig-on sa grasya sa Ginoo. Gikan sa gamay nga grupo sa pag-ampo, hangtod karon nga usa na kami ka lig-on nga GKK, amoang gisaulog ang ika-50 ka tuig nga panaw uban sa among patron nga si Sr. San Roque—ang santos nga among gipangayoan ug panabang ilabi na sa panahon sa kasakit ug kalisod.

Ang Santos nga Misa sa gisalmotan uban sa dakong pagtuo gipangulohan ni Rev. Fr. Amado Arroyo, kura Paroko sa Sr. San Roque Parish, Malabog, diin nahisakop ang among katilingban. Sa iyang homiliya, giila niya ang GKK isip sumbanan sa kusog, pagtuo, ug panaghiusa. Gi-awhag usab niya ang tanang miyembro sa GKK nga ipadayon ang matinud-anong pag-alagad sa Diyos ug sa isigkatawo pinaagi sa mga buhat sa kaluoy ug tinuoray nga pagkahiusa.

Human sa santos nga misa, gipadayon ang kalipay pinaagi sa mga kalihokan nga nagdala sa katawa o kalingawan sa mga katawhan nga mao ang “Folk Song ug Folk Dance” nga gisalmotan kini sa tulo ka grupo.

Mapasalamaton pag-ayo ang Pangulo Sa Katilingban (PSK) nga si Mary Jane A. Detua sa presenya ug sa mga maanindot nga mensahe nga gihatag sa among talahuron nga Kura Paroko. Nagpasalamat usab siya mga kaubanang miyembro, GKK Servant Leaders kun GSL, sa mga katawhan nga gikan sa nagkalain-laing Sona o lugar aron lamang sa pagpakigduyog sa among ika-50 nga kapistahan ug labaw sa tanan ang atong Ginoo nga mao ang tinubdan sa tanan.

Ang ika-50 nga anibersaryo sa GKK Sr. San Roque, Kialaw dili lamang kalampusan sa miaging mga katuigan, apan usa ka bag-ong sinugdanan – usa ka tawag sa katawhan nga ipadayon ang pag-alagad, pagpanalangin sa isigkatawo, ug pagpanukad sa mas lig-on nga pundasyon sa pagtuo.

Padayon ta sa panaw. Uban ta kanunay ni Sr. San Roque, ang atong manlalaban sa panahon sa kalisdanan. Malipayong Bulawanong Hubileyo! (Jomar B. Saguban | GKK SoCCom)