Rekoleksyon Sa Mga Katekista Gipahigayon

Nagpahigayon og duha ka adlaw nga rekoleksyon ang mga school catechists uban sa mga zone coordinators sa Parokya sa Sagrada Pamilya sa Barangay Dumoy-Baliok niadtong Septembre 29-30 didto sa Our Lady of Victory Training Center, Camudmud, Island Garden City of Samal. Tumong sa maong aktibidad ang pagbalik-lantaw sa kinabuhi ug panaw sa usa ka katekista kansang misyon mao ang pag-umol sa mga tinun-an nga makabaton og maayong pormasyon subay sa pagtulun-an sa simbahan.

Nahimong tigpasayon sa maong panagtigom ang Parish Formation Ministry Coordinator, si Mrs. Madelyn Tito. Siya naghan-ay sa mga aktibidad sama sa pagpamalandog, pag-ila sa grasya sa Diyos, pag-inambitay ug pakigsuod sa presensya sa matag-usa.

Kauban usab sa maong pundok ang kura-paroko nga si Fr. Dionisio Tabiliran, nga maoy nanguna sa pagpatag ug pagpa-ambit bahin sa tema nga “Mga Katekistang Malaumong Nanag-uban sa Panaw”. Sa kinatibuk-an ang maong sesyon nag-abli sa matag-usa alang sa mas halaum nga pag-ila sa kaugalingon ug nagpasayon sa pagtubag sa tawag sa Diyos isip mga magtutudlo sa mga hiyas sa pagtoo. Ang maong panagtigom, natak-op pinaagi sa usa ka Santos nga Misa nga gipanguluhan ni Fr. Diony Tabiliran.

Ania ang tipik sa pipila ka mga pamalandong:

“Bisan sa mga pagsulay, magpadayon sa pag-alagad ug mapadayunong pag-usab sa kaugalingon aron makab-ot ang kalipay ug kinabuhing dayon.” – Georgina Placencia.

“Nauna na og pas-an ang Ginoo sa tanang mga pagsulay busa padayon ako sa pag-atubang sa mga pagsulay, gamay man o dako.” – Lorna Tindan.

“Malipayon akong kabahin sa kalihukan sa mga katekista. Padayon ko sa pag-alagad sa simbahan.” – Reynaldo Malimban.

“Nasabtan nako ang tingog sa Ginoo pinaagi sa mga hapak sa mga balod ug huyuhoy sa hangin. Pagkanindot sa maong dapit.” – Aurora Eso.

“Madasigon ko nga mualagad, makigdait ug maglikay nga makapasakit sa akong isig-katawo kay ang akong relasyon sa Diyos ug relasyon sa tawo dili mabuwag.” – Lalaine Paña.

“Mapasalamaton ako sa presensya sa among kura paroko nga nikuyog sa among panaw isip mga katekista. Dako ang akong kalipay sa among panagtapok.” – Norielyn Sashing.

“In every struggle, in every pain, in every worry and in every doubt, I have my God who has stayed by my side.” – April Ann Mendoza.

(By Flor Arellano-Deloria, HFP SoCCoM)