Kapistahan sa Kristong Hari Gisaulog

Nagkahiusa ang Katolikong magtutuo sa usa ka dakong pagsaulog sa Solemindad sa Kristong Hari niadtong Nobyembre 23, nga gitimaan sa katapusan sa tuig liturhikal sa Simbahang Katoliko.

Sa parokya sa Sagrada Pamilya sa Brgy. Dumoy-Baliok, Davao City adunay gipahigayong prusisyon nga gilangkuban sa mga parokyano nga nanambong sa unang misa. Ang pagkuyog sa prusisyon nagpakita sa pag-ila nga si Jesus ang Hari sa tanang Hari nga ehemplo sa mapaubsanong pag-alagad.

Gani atol sa maong dakong kapistahan, gipahigayon usab ang sending forth ug renewal of commitment sa mga Altar Servers sa parokya kung diin sila gipahinumduman sa paghatag sa kinasing-kasing nga pag-alagad nga adunay pagpaubos ug pagkamasinuptanon.

Sa laing bahin, sa GKK Christ the King, Dusnai malipayong gisaulog sa mga miyembro ang ilang ika-27 nga kapistahan. Ang misa gipanguluhan ni Fr. Danilo Dotollo, DCD, Parochial Vicar sa Holy Family Parish.

Dakong pasalamat ni Cione Tayo, PSK sa maong GKK tungod nasinati niya ang kahapsay sa pagpahigayon sa mga buluhaton nga dunay panaghiusa ug panag-ambitay sa mga miyembro sa GKK. Siya nanghinaot nga magpadayon ang kahiusahan ug pag-alagad sa ilang katilingban.

Didto usab sa GKK Christ the King sa Dacoville, magmaya ang mga miyembro sa katilingban sa ilang bililhong selebrasyon, ika-50 nga kapistahan sa GKK. Tataw kaayo ang kalipay hilabi na gayod sa mga katigulangan nga nakasalmot sa espesyal nga okasyon. Ang ika-50 nga kapistahan sa GKK Christ the King, Dacoville naghulagway sa lig-on ug buhing katilingban nga giampingan aron mapalig-on ug mapadayon sa umaabot pang henerasyon.

Si Bishop George Rimando, DD ang nangulo sa maong misa inubanan ni Fr. Dionisio Tabiliran, DCD. Ang obispo nagpadayag sa iyang dakong kalipay sa pakig-uban sa mga katawhan sa GKK atol sa ika-50 nga kapistahan. Matod niya, angay gayod nga pasalamatan ang Ginoo sa paghatag ug grasya,pagtuo, kusog, paglaum sa sulod sa 50 ka tuig. Siya nanghinaot nga magpadayon ang katilingban sa paglawig dala ang hiyas nga gipadayag sa Kristong Hari aron kini matisok sa kasing-kasing sa umaabot pang henerasyon.

Gipasalamatan ni Betty Soliban, PSK sa GKK Christ the King Dacoville, ang tanang mga lumilihok sa malampusong selebrasyon sa ilang ika-50 nga kapistahan. Natandog usab siya sa presensya ni Bishop George ug Fr. Diony sa ilang paggahin ug panahon nga makighiusa sa ilang kalipay ug pagpasalamat.

Sa katapusan, ang dakong selebrasyon sa tibuok Katolikong Simbahan usa ka pahinumdom kanatong tanan nga si Kristo ang Hari sa tanang mga hari. Dili ikalimod nga si Kristo maoy hari sa gugma nga naghatag sa iyang kaugalingon hangtod sa iyang kamatayon sa krus. Hinaot nga ang pagkahari ni Kristo magpahinumdom sa tanan nga pinaagi kaniya, makab-ot ang tanang kadaugan bisan pa man sa mga kalisdanan. Ang pagkahari ni Kristo magdala unta kanato sa panaghiusa pinaagi sa matinud-anong pag-alagad sa matag-usa. (Flor Deloria, HFP SoCCom | Photos: DCH, Nenen Podador, CTK Dusnai, Daisy Masalunga)