Panaw-Duaw Gikan sa Baliok Padulong sa Toril

Niadtong buntag sa Nobyembre 8, nagpahigayaon ug pilgrimage ang mga parokyano gikan sa Parokya sa Sagrada Pamilya. Ang maong aktibidad gihimo subay sa pagsaulog sa tuig sa hubileyo kung diin ang mga katawhan sa Dios gidasig sa pagpangayo og pasaylo, paghinulsol ug pag-ampo.

Gikan sa parokya sa Sagrada Pamilya sa Baliok, nagpadulong ang mga peregrino sa Simbahan sa Sto. Rosario, Toril nga usa sa mga natudlo nga pilgrim church sulod sa Arkidayosis sa Davao.

Sa wala pa niabot ang adlaw sa panaw-duaw niagi ang mga perigrino sa proseso sa pagpangandam sa kaugalingon sama sa Orientation nga gitahag ni Ms. Madelyn Tito, Formation Ministry Parish Coordinator, kung diin gipasabot pag-ayo ang katuyoan sa maong panaw nga dili lamang usa ka biyahe padulong sa laing lugar apan usa kita ka espesyal nga espirituwal nga nga panaw sa sagradong lugar aron mag-ampo, mangayo ug pasaylo ug puy-an ang grasya sa paglaum.

Bag-o pa man niabot ang adlaw sa panaw-duaw, nihimo usab sa Sakramento sa Pakighiuli ang mga perigrino aron mahingpit ang pagdawat sa mga indulehensya nga gisaad sa maong panaw-duaw.

Nitambong una sa misa ang mga perigrino ug paghuman gisunod ang rito alang sa panaw-duaw nga gipanguluhan sa kura-paroko, Fr. Dionisio Tabiliran, DCD.

Makahuloganon gayod ang gihimong panaw-duaw tungod kay nabati sa katawhan ang presensya sa Dios nga kanunay nagalantaw sa katawhan, tataw nga hulagway nga bisan luyo sa kalisdanan ug sa mga mapait nga kasinatian anaa ang Dios sa atong taliwala, naga-uban kanato nga kita dili kawad-an sa paglaum. Ang nahitabong panaw-duaw usa ka halangdon mga higayon sa pagpadayag sa hiiusang tinguha ug paglaom alang sa kaayuhan sa kaugalingon, pamilya ug nasud. (Flor Arellano-Deloria)