Virgen Delos Remedios Parish ground breaking ceremony

Atol sa kasaulogan sa kapistahan ni San Pedro ug San Pablo gipangunahan sa birthday priest nga si Fr. Johnny Autida ang ground breaking ceremony sa Virgen Delos Remedios Parish sa Crossing Bayabas, Toril niining dakbayan, niadtong Hunyo 29.

Gisugdan ang maong selebrasyon sa pagsaulog sa Santos nga Misa diin giingnan ni Fr. Autida ang mga parokyano nga ang bag-uhay nga gitukod nga simbahan gitindog dili tungod kaniya, apan tungod sa mga aktibong parokyano nga andam mugahin sa ilang oras ug talento sa kalambuan sa simbahan.

Sa mismong 52 nga tuig sa iyang adlaw’ng natawhan, ug ika-limang tuig isip kura paroko gihimo usab ang “ground breaking” alang sa pagpadayon sa pagtukod ug pagpalambo sa maong simbahan. Ampo niya sa iyang birthday nga hatagan pa sila ug dugang kadasig dili lamang isip usa ka kura paroko apan ang mga katawhan sa pagpadayon sa pagsangpit sa Ginoo pinaagi sa pag-ampo. (Angelika Calano | SoCCom)