Maghimaya Ka Maria!

Usa ka simple nga pag-ampo nga kanunay nato nga gibungat. Unsay kahulogan niini? Unsay kahulogan sa atong selebrasyon karong adlawa? Mao kini ang pipila ka pangutana ni Bp. Jimmy Afable sa iyang homiliya niadtong Disyembre 9, sa parokya sa Imakulada Conception niining adlaw sa pangilin sa Solemnidad sa Pagpanamkon ka Maria.

Gipasabot ni Bp. Afable nga niining adlawa, atong gisaulog ang usa ka misteryo sa dakong grasya. Iyang gisugdan sa pag-ingon nga si Maria usa ka ordinaryong babaye, anak ni Ana ug ni Joaquin. Si Ana ug Joaquin usa ka magtiayon nga Diosnon, maalagaron ug matuod nga panig-ingnan sa pagka-balaan. Ug si Maria naliwat kanila, ang babaaye nga gitakna nga mamahimong Inahan sa Dios. Usa ka piniling babaye nga gipanamkon nga limpyo, walay bahid sa sala nga panulundon ug balaan. Kini posible lamang mahitabo tungod sa grasya. Usa ka dakong grasya nga nahitabo aron mamahimong takus si Maria sa pagmabdos kang Hesus.

Dugang niini, gipasabot sa obispo ang kahulugan sa pag-ampo sa “Maghimaya ka Maria”. (Elsa Grande-Navales | Kiblawan SocCom)