Mga Peregrino sa Porta Sancta

Niaging tuig, sa pag abli sa pultahan sa mga napiling parokya dinhi sa Arkidayosis sa Dabaw nga nagsilbing timaan sa pagsugod sa ika-kinyentos nga tuig sa Kristyanismo dinhi sa Pilipinas, dili tanan ang nahibalo nga dakong grasya ug indolehensya ang ilang makaplagan sa pagsulod niining mga balaang pultahan nga inubanan sa pagpangumpisal ug mga pag-ampo.

Apan sa nagsugod na ug panirado matag pultahan sa sulod sa Oktaba sa Pasko sa Pagkabanhaw, daghan ang naningkamot nga maka apil sa maong seremonya ug sila nag-uban sa panon sa panaw sa maong mga pagsirado.

Kabahin dinhi ang mga myembro gikan sa parokya sa Our Lady of Fatima nga sakop sa Deliverance Ministry nga usa ka charismatic group. Sila ni Jo ug Yolly nga managhigala, nagsugod sa pagtambong niining mga misa ug seremonya sa pagsirado sa mga balaang pultahan didto sa St. James the Apostle Parish sa Bunawan niadtong Abril 17, Dominggo sa Pagkabanhaw. Sila mipadayag sa ilang kalipay tungod sa mga gasang nadawat ug sulti nila, “perfect timing” ang pag lift sa mga safety protocols sulod sa Easter Season. Tuod man aduna sab silay mga pinangayo ug special intentions apan mulabaw gayod ang mga pagpasalamat tungod nahitabo kining mga katikaran human sa duha ka tuig nga kamingaw sulod sa simbahan. Ako nasab silang nakita sa parokya sa St. Jude sa Malvar niadtong Huwebes sa Oktaba sa Pagkabanhaw duyog ang usa ka bag-ong kauban nga si Jun Espartero, nangaliyupo alang sa iyang kaayohan.

Sa parokya usab sa Sta. Ana, nakaplagan ko ang grupo sa Legion of Mary gikan gihapon sa parokya Our Lady of Fatima. Tulo sila nga mga myembro nga adunay nagkadaiyang mga pag-ampo halad sa Inahan sa atong Manunubos. Sama sa usa kanila nga dili magpaila, nga nanghinaot sa kabag-ohan sa iyang anak. Iyang panghinaot nga makaplagan sa iyang anak ang kaluoy ug gugma sa Ginoo aron siya usab makat-on sa paghigugma sa uban.

Kahilakon sab nga mipaambit ang usa ka asawa tungod iyang ginaampo ang kabag-ohan sa iyang bana. Tuo ug naglaom gyod siya nga sa iyang pagpangamuyo kang St. Jude, mas dunggon sa Ginoo ang iyang pag-ampo. Inubanan sa iyang anak nga nangalagad isip lector/commentator sa parokya, kanunay nilang ginahalad ang iyang bana aron siya mahibalik sa sabakan sa Ginoo.

Kung adunay mga nangayo pa, aduna usab nga nakakaplag na sa panabang ug kaayo sa Ginoo. Kini si Sister Helmarie Laňohan nga deboto sa Diyosnong Kalooy gikan sa Immaculate Conception Peňaplata, sulti niya dako kaayong milagro ang miabot sa iyang kinabuhi ug mituo siya nga usa sa mga rason niiini ang pagbubo sa grasya tungod sa balaang pultahan nga miabli alang sa mga katawhan sa Samal. Ang iyang anak na diagnose diha sa sakit nga Lupus ug ang na igo sa iyang internal organs mao ang iyang baga. Apan sa panabang sa Ginoo, sa iyang pagtuo, ug diha sa iyang pag-ampo sa siya nisulod niining balaang pultahan, wala magkagrabe ang komplikasyon sa iyang anak ug bisan tuod aduna pay COVID wala siya matakbuyan niining virus.

Tingali mas daghan pa ang mga sama ni Sister Helmarie nga naka kaplag diha sa dakong grasya sa Diyos. Ginagmay man o dagkong mga milagro mapasalamaton ang tagsa-tagsa tungod sa pagtuo nga atong nadawat gikan sa mga misyonerong mianhi dinhi sa atong nasod.