Bililhong Gasa Sa Espiritu Santo

Tuig 2018, sa nagtrabaho pa ako sa usa ka BPO Company diri sa dakbayan, naandan na ang paginom-inom human sa trabaho sa adlawng Sabado sa buntag tungod kinaulahiang adlaw kini sa among work week. Ubay-ubay sab ang akong nainom ug tungod niini miuli ko nga naay hyperacidity ug nagsigeg suka. Pag-abot nako sa among balay, naay gipahigayon nga prayer meeting ang usa ka charismatic group nga myembro usab sa ACLAIM o Archdiocesan Council of the Lay Apostolate and Integrated Movements nga mao ang Holy Infant Community. Dili na kini bag-o kanako tungod pipila na ka higayon nga naka apil ko, apan niadtong tungora, buot nakong muapil aron maayo ang akong hyperacidity ug maundang ang akong pagsuka.

Matag prayer meeting, una magsugod ang pagpaambit sa mga kasinatian ug pamalandong mahitungod sa mga pulong o verses sa Bibliya, kanunayng pangayuon ang lamdag sa Espiritu Santo diha sa pagkanta sa Come Holy Spirit. Piniyong ang akong mga mata, nangamuyo ako nga ayuhon sa Ginoo ang akong balatian bisan tuod ako ra gihapon ang hinungdan sa maong kasakitan. Panahon sa praise and worship, kalit nga miabli ang akong mga ngabil nga nagkurog ug namulong ug mga pulong nga wala ko gayod masabti. Nagtulo nalang ang akong luha tungod nabati ko ang kainit, ang kapaspas ug kakusog sa akong kasingkasing; ang Espiritu Santo.

Sa akong huna-huna dili ako angay ug dili gayod takos sa pagdawat niini nga gasa. Usa ako ka dakong makasasala ug dili ako “deserving”, kini angay lamang sa mga tawong buotan. Apan nahinumdom ko nga ang Ginoo walay gipili, gani mas malipay kung ang makasasala mag bag-o sa iyang kinabuhi.

Ug sa English pa, “words cannot even describe how it was”. Kulang ug dili makudlit sa mga letra ang akong gibati. Ang balaang Espirito Santo dili gayod makita, apan masinati. Sumala pa sa uban ako gitagaan sa “gift of tongues” ug nahinumdom ko nga sa akong pag-apil sa Christian Life Program sa Singles for Christ, akong gihangyo ang Ginoo nga dili lang ko tagaan niini nga gasa tungod dako kini nga sangon. Bisan tuod dili nako masabtan kining mga pulonga, nahibalo ako nga kini dinasig sa Espirito Santo, inspirasyon nga gikan sa Diyos nga gikinahanglan nga ibungat.

Ang gasa sa “pagtongues” usa gihapon ka form of prayer, usa ka intimate prayer nga ang akong kalag lang ug ang Ginoo ang nakasabot. Sa akong huna-huna akong gina maymay ang mga intensyon nga akong buot iampo ug tingali kining mga pulong gikan usab sa kinauyokan sa akong kasingkasing. Tuod man gasa sa pagkamainampoon ang akong gipangayo sa Diyos apan labaw pa ang gasa nga Iyang gipiyal.

Apan angay natong hinumdoman nga dili lang diha sa pagtongues mabati ang Espirito Santo. Gani kung kita anaa sa kahilom ug pagpamalandong, madungog nato Siya sa kanunay. Ang tingog nga atong madungog nga murag hunghong kon unsay maayong himuon, Espirito Santo kana nga maoy naghatag og lamdag kanato sa saktong dalan. (CMAC)