Hagit Sa Pagkaputli Sa Kasingkasing

Usa ka hagit ang gilabay ngadto sa mga deboto ni Birhen Maria sa mga taga zone 10 Matina Gravahan ubos sa Ascension of the Lord Parish atol sa ika-61 nga kapistahan sa Gagmay’ng Kristohanong Katilingban sa Imakulada Konsepsyon.

Mao kini unod sa homiliya ni Reb. Padre Orlando Angelia, kinsa maoy nangulo sa Santos nga Misa adlawng Sabado, Disyembre 7 sa alas-8 ang takna sa buntag sulod sa ICC GKK.

Ang kapin 200 ka mga nanambong sa Santos nga Misa gihagit ni Fr. Angelia, ang director sa Family and Life Apostolate ug Rector sa St. Francis Xavier College Seminary nga magbaton ug putli nga kasingkasing sama kang Birhen Maria.

Gipasabot ni P. Angelia nga giandam si Maria sa Diyos nga putli kon walay salang panulondon sukad sa pagsabak kaniya ni Santa Ana sanglit siya man ang mamahimong unang tabernakulo nga magdala kang HesuKristo sa iyang sabakan, “mao nga Imakulada Konsepsyon ang Mahal nga Birhen Maria , siya ang unang bunga sa kaluwasan ni Hesus. Siya ang unang epekto sa redemptive act sa makaluwasnong buhat mao na nga wala siya nabulingan sa sala.”

Dayon gipangutana niya ang mga nanambong kung unsa ang sikreto ni Maria nga nagpabilin kining putli gikan sa iyang pagpanamkon hangtod na sa iyang pagkayab kon Assumption ngadto sa Langit” nagpabilin siya nga putli sa tibuok niyang kinabuhi.

Siya midugang nga si Maria, mituman sa kabubut-on sa Diyos ug hingpit nga mihatag sa iyang kaugalingon ngadto sa Diyos busa anaa ang grasya sa Diyos kaniya.

Apan, misumpay si P. Angelia nga ang grasya sa Diyos nagkinahanglan kini ug kooperasyon ug nagkinahanglan kini sa “paghimo sa atong papel o role sa kalibutan.”

Isip panig-ingnan, matud ni P. Angelia, ang mithi nga mamahimong panig-ingnan sa tawo kang Maria mao ang iyang pagka-balaan. “tungod sa iyang pagka-putli sa kasingkasing; bisag unsaon nimo ug nidnid ug glutathione sa imong nawong, apan pangit ang imong kasingkasing, maguba na ang pagtan-aw kanimo sa tawo.”

Siya nagkanayon, “sa ato pa, ang kasingkasing ang nag-determine sa unsang pagka-tao kita, busa unsa man ang mga gitinguha sa atong kasingkasing karon?’ alang sa isigka-ingon: kaayuhan ba alang sa uban? Putli ba ang atong kasingkasing? Nahaom ba kini sa kabubut-on sa Diyos?”

Siya midugang, “ang ato bang mga tinguha, sama sa kasingkasing ni Maria nga nagtinguha sa kabubut-on sa Diyos? Kinsa miingon, “sulogoon ako sa Diyos , matuman dinhi kanako ang Iyang Pulong.”

Ikaduha nga punto nga gipasabot ni P. Angelia, ang kasingkasing ni Maria naka-align sa kabubut-on sa Diyos ug tungod niini, kanunay nga 100% dunay kusog nga koneksyon sa Ginoo.

Gipadayag ni P. Angelia ang pangandoy nga unta sa pagmata sa buntag, ang tanan moingon nga “Lord, sulogoon mo ako, unsay ipabuhat mo kanako, andam ako.”

Luyo sa mga kakulian sa kinabuhi, gi-aghat niya ang mga nanambong sa Misa nga ang kasingkasing unta kanunay nga andam nga mo-konek sa Diyos ug sa pagtuman sa Iyang kabubut-on.

“Pagmata sa buntag hangtod sa pagkatulog sa gabii, konektado kita sa plano sa Diyos,” siya midugang.

Tema sa maong kapistahan ning tuiga mao ang, “Birhen Maria, Modelo sa paglaum ug kalig-on sa pagtoo diha sa nagapanaw’ng piniyalang katilingban.”