Pinakadakong Gasa

Ika-4 nga Domingo sa Adbiyento (Dec. 22, 2024)
Micah 5:1-4a / Ps. 80:2-3, 15-16, 18-19 / Hebrew 10:5-10 / Luke 1:39-45

Unsang matang sa gasa ang gidala ni Maria kang Isabel? Sa pagkatinoud, wala man ta gisultihan kung siya ba nagdala og pagkaun o wala. Apan nasayod ta nga nagdala siya’g usa lang ka butang: ang iyang kaugalingon. Ug iyang gihatag kang Isabel ang gasa sa iyang presensya. Mga igsoon, kini ang pinakamaayo ug pinakalisud nga gasa sa tanan.

Sayon lang ang pagpadala og mga bulak, sayon lang ang pagpadala og parcel, apan ang paghatag sa gasa sa atong kaugalingon, ang paggahin og panahon nga makauban ang usa ka tawo, mao kana ang regalo nga gipangandoy sa daghang tawo apan wala makadawat sa Pasko.

Busa kining Ebanghelyo nato karon, nagdasig kanato nga gawas sa paghatag og bulak, parcel, kita makakat-on sa paghatag sa atong kaugalingon, presensya ug panahon sa uban. Kinahanglang mangita kita ug panahon sa pagbisita ug pagpakig-uban sa mga tawo. Kini ang labing dako nga regalo tungod kay ang kantidad niini dili ma-calculate sa kantidad sa salapi.

Ang laing punto nga atong makuha gikan sa gasa ni Maria kang Isabel. Mao nga ang usa kinahanglan mohatag dili sumala sa iyang gusto, kondili sumala sa panginahanglan sa tawo. Tan-awa si Maria, dili gyud to sayon o convenient ang iyang pagbyahe, ug gani sa pagkatinoud peligroso ang dalan nga ilang maagian; gikan sa Galilea paingon sa kabungtoran sa Judea.

Sa pagkatinoud, kini usa ka bug-at nga buluhaton nga gihatag kang Maria. Apan tungod kay kabalo man si Maria nga kinahanglanon usab ni Isabel ang iyang tabang mao ng iya kining gitabangan. Unom ka bulan siya nga mabdos ug dili na siya makaadto ug magkalos ug tubig sa atabay sa baryo, aron maatiman ang mga tanom sa iyang tanaman ug ang mga mananap sa iyang uma, dili na siya makaadto sa merkado aron pagpamalit.

Busa sa kataposan, sama kang Maria, makakat-on usab kita’g mutabang sa uban, luyo sa atong kalisdanan, luyo sa atong mga kakapoy ug uban pa. nasayod ta nga kita usab nanginahanglan ug tabang, apan kabalo usab kita nga ang uban mas nanginahanglan ug tabang. Hinaot mas mubug-at pa ang atong pagtabang sa uban, kaysa pagtabang sa atong kaugalingon. (Fr. Ranie Boy Pamplona)