Jesukristo: Pari, Propeta, ug Hari

Ang pagbunyag kang Hesus sa Suba sa Jordan nagtimaan sa sinugdanan sa Iyang publikong pagpangalagad o public ministry, ug sa pagpadayag sa Iyang tulo ka misyon isip Pari, Propeta, ug Hari. Sa dihang nabunyagan si Hesus, ang langit naabli ug ang tingog sa Amahan nag-ingon: “Ikaw ang Akong pinalangga nga Anak. Diha Kanimo nahimuot Ako.” (Lukas 3:22). Kini usa ka klaro nga pagpaila sa Iyang tawag ug katuyuan alang sa kaluwasan sa katawhan. Pinaagi sa pagbunyag, gipadayag ni Hesus ang Iyang pagkaandam nga mopadayon sa Iyang misyon ug sa paghalad sa Iyang kaugalingon alang sa kaluwasan sa tanan.

PARI: Ang misyon ni Kristo isip Pari mao ang pag-ampo ug pagpasaylo aron ipahiuli ang relasyon sa katawhan sa Dios. Sumala sa Hebreo 5:6, si Hesus mao ang walay kataposang Labawng Pari nga naghalad dili pinaagi sa mga hayop o mananap, kondili pinaagi sa pagtugyan sa Iyang kaugalingong kinabuhi alang sa tanan. Ang Iyang sakripisyo mao ang tinuod nga halad nga naghatag ug hingpit nga kapasayloan ug kaluwasan alang sa tanang katawhan.

PROPETA: Isip usa ka Propeta, gipadayag ni Hesus ang Maayong Balita ug ang mensahe sa Dios. Sa Iyang kinabuhi ug pagpangalagad, Iyang gitudlo ang kalooy, hustisya, ug gugma sa Dios. Pinaagi sa Iyang mga pulong ug milagro, gipadayag Niya ang mensahe sa kaluwasan, gingharian, ug ang kabubut-on sa Amahan alang sa tanan. Ang Dei Verbum 4, nagpasabot nga si Kristo mao ang kinatibuk-ang kapadayagan sa Dios, nga nagahatag ug hingpit nga kasayuran mahitungod sa kaluwasan.

HARI: Isip usa ka Hari, si Hesus nag-alagad uban sa pagpaubos ug gugma, dili ingon usa ka gahom nga magapahari kondili usa ka Hari nga nag-alagad ug nagdala og katarong, kalinaw ug kaluwasan. “Ang Anak sa Tawo wala moanhi aron paga-alagaran, kondili aron mag-alagad ug maghalad sa iyang kinabuhi ingon pagtubos alang sa tanan” (Mateo 20:28). Diha sa Juan 18:36, gipadayag ni Hesus nga ang Iyang gingharian dili yutan-on apan espiritwal—usa ka gingharian sa katarong, kalinaw, ug gugma. Pinaagi sa Iyang kinabuhi, gipakita Niya ang tinuod ug perpektong ehemplo sa pagpangalagad pinaagi sa mga buhat sa gugma, kalooy ug pagpaubos.

Isip mga binunyagan, kita gitawag nga mosalmot ug muambit sa misyon ni Kristo. Diha sa CCC 1273 gipahinumduman kita nga pinaagi sa atong bunyag kita nahimong kabahin sa tulo ka misyon ni Kristo isip Pari, Propeta, ug Hari. Gitawag kita sa pagdala ug pagsangyaw sa mensahe sa Dios, ug pagbuhat og sakripisyo alang sa uban pinaagi sa mga buhat sa gugma, sama sa pagtabang sa espiritwal ug pisikal nga panginahanglan sa atong isigkatawo (CCC 2447).

Ang bunyag ni Hesus mao ang sinugdanan sa Iyang dakong misyon nga nagdala sa kaluwasan alang sa tanan. Kini usa ka panig-ingnan sa atong responsibilidad isip mga binunyagan, diin sa atong kinabuhi kita magapadayon sa pagpuyo isip mga propeta, pari, ug hari. Sa adlaw sa pagsaulog nato sa pagbunyag kang Hesus nga atong Ginoo, mao usab ang katapusang adlaw sa pagsaulog sa panahon sa Pasko. Apan bisan pa niana, kita magapadayon gihapon sa pagsaulog tungod sa dakong gugma sa Dios alang kanato pinaagi sa pagpadala Niya sa Iyang Anak nga si Hesus.

Sa atong kinabuhi, hinaut nga atong masabtan ang kahulugan sa pag-alagad, gugma, ug pagkamatinud-anon, sama sa gipakita ni Hesus sa Iyang kinabuhi ug misyon. Hinaut usab nga ang atong kinabuhi mamahimong buhing saksi sa Iyang dakong misyon alang sa tanan. Mag-ampo kita nga ang Espiritu Santo magapadayon sa paggiya kanato sa dalan sa kahayag, kamatuoran ug kaluwasan! (Marijoe C. Castroverde – JCC scholar)