
Pasalamat Sa Gasa Sa Kristohanong Pamilya
Gisaulog sa St. Mary of the Perpetual Rosary Parish Buhangin ang tinuig nga Parish Family Day 2024 kaniadtong Enero 5, 2025 subay sa Solemnidad sa Epipanya sa Ginoo sulod sa Parish Gym. Giduyogan kini sa mga GKK Servant Leaders (GSL), Tigpasayon sa Pundok Banay (TPB), GKK Finance Committee, ug Parish Recognized Organizations (PARECO) gikan sa mga nagkalain-laing GKK nga sakop sa Parokya.
Ang tema karong tuiga mao ang “Kristohanong Pamilya nga Malaumong Magpapanaw Taliwala sa mga Hagit ug Pagsulay sa Kinabuhi”. Kini mao ang tinuig nga hiniusang pagpasalamat ngadto sa mga pangulo sa ilang paghigugma sa Simbahan. Matod pa ni Fr. Diony, sama sa Bituon ni Kristo nga nagdan-ag sa mga maalamong tawo ug nahimong simbolo sa pagpadayag ni Kristo sa Iyang kaugalingon sa tibuok kalibutan, hinaut nga ang mga lumilihok usab mahimong susama sa Bituon nga molamdag sa mga tawong nanginahanglan ug mosangyaw sa Maayong Balita sa Ginoo.
Napuno ang Parish Family Day sa kalipay ug kamaya tungod sa mga nagkadaiyang talento sa pagsayaw nga gipasundayag sa mga nagkalain-laing mga ministriya sa Pangulo sa Panudlo, Pangulo sa Kristohanong Banay ug Social Communications Committee ug usab sa pagkanta sa choral groups sa parokya nga mao ang St. Mary Youth Choir ug Tigatto Voices.
Gitagaan usab ug pasidungog ang mga Parish Service Awardees nga nangalagad ug kapin 25 ka tuig sa Simbahan. Nakadawat ang mga awardees ug plaque isip pasalamat sa ilang paningkamot ug pagpanerbisyo sa ilang mga GKK ug sa Parokya sa SMPRP. Sila mamahimong modelo ug inspirasyon sa ubang mga pangulo aron magpabiling makugihon ug makanunayon sa ilang pagpangalagad sa Simbahan.
Dili usab mawala sa Parish Family Day ang Raffle diin daghang mga papremyo sama sa mga bugas, ug appliances ang madawat sa mga nanambong. Pinanguluhan sa Parish Social Action Ministry (PSAM) napuno sa katawa ug kalipay ang tibuok Parish Gym samtang malaumong nagalantaw ang mga pangulo sa ilang tagsa-tagsang mga numero ug raffle stub.
Tinuod gayud nga dili mamahimong mabungahon ug mapadayunong ang Simbahan kon wala ang mga nagkalain-laing pangulo nga mapadayong nangalagad ug nagsakrispisyo. Isip usa ka Kristohanong Pamilya sa lokal nga Simbahan sa St. Mary’s Buhangin, manghinaot kita sa Langitnong Amahan nga kanunay na panalanginan ug giyahan ang mga lumilihok aron magpabilin nga buhi ang pagtuo ug diwa sa Simbahan taliwala sa mga hagit nga anaa niining kalibutan.
Happy Parish Family Day 2024!
(By Allyza Hope J. Tabigue, GKK SoCCom of SMPRP)
No Comments