A.C.E. Com Gipalig-on

Aron nga mahapsay ang pagtuman sa mga buluhaton alang sa umaabot nga Nasudnon ug Lokal nga Piniliay, gilig-on sa Archdiocesan Citizens’ Engagement Committee (A.C.E. Com) ang mga komitiba ug estruktura sa komunikasyon.

Ang A.C.E. Com maoy gitagaan ug katungod sa Parish Pastoral Council for Responsible Voting (PPCRV) nga maoy mamahimong citizens arm alang sa piniliay dinhi sa Arkidayosis sa Dabaw.

Mao kini ang namugna nga organizasyon nga naghiusa sa kalambigitan sa Archdiocesan Social Action Center (ASAC) alang sa mga Parokya ug sa Davao Association of Catholic Schools (DACS) alang sa mga tulunghaan.

Gihan-ay na ang nagkalain-laing komitiba nga maoy mag-atiman sa mga panginahanglanon sama sa Values Formation Team nga gilangkuban sa mga miboluntaryo gikan sa mga Parokya ug sa mga tulunghaan. Sila ang maghatag ug political values formation sa nagkalain laing Parokya ug mga tulunghaan aron katabangan ang mga botante nga makapamalandong sa ilang tagsa-tagsa ka kaugalingon ning panahon sa eleksyon.

Anaa usab ang mga komitiba nga magsilbi nga suporta sa mga District Coordinators sa tulo ka mga Distrito sama sa legal, logistics, communication, reportage/promotions, recruitment, liturgy, radio communication ug secretariat.

Matud pa ni Reb. P. Leonardo Dublan, Jr., ASAC Director, nga sa milabay nga piniliay, mga 80% lamang sa gilaumang mga miboluntaryo ang na-cover sa A.C.E Com. Ning tuiga, gilaumang malukop siyento-por-siyento ang 200 kapin ka mga voting centers nga gilangkuban sa 4,616 ka mga presinto sa Arkidayosis sa Dabaw.

Tabangan sa mga tulunghaan ug sa mga Parokya ang pagpanglista sa mga volunteers nga maoy modumala sa Voters Assistance Desk (VAD), poll watching, ug ingon man ang pagdawat sa kopya sa election returns.

Andam na usab ang mga materyales alang sa radyo (DXGN 89.9 Spirit FM), social media, ug mantalaan (Davao Catholic Herald) alang sa promosyon nga mopakusog sa mga pagtuki sa mga programa sa radyo sa DXGN 89.9 Spirit FM. Ipahigayon sa ulahing tulo ka Byernes una pa ang piniliay ang espesyal nga programa nga giuluhan ug TALAKAYAN nga isibya sa Abril 25, Mayo 2 ug Mayo 9, alas 6:00-8:00 sa gabii.

Gipahimangnuan ni Reb.P. Dublan ang mga dawaton nga mga volunteers nga magpabilin nga walay suportahan nga kandidato base sa tulumanon sa PPCRV. Magpalista lamang sa tagsa-tagsa ka mga Parokya pinaagi sa parish social action ministry (PSAM) ug sa mga social action nga buhatan sa matag tulunghaan. HInoon, gipaklaro usab ni P. Dublan nga ang tanang mga listahan hiusahon dinha sa ilang tagsa-tagsa ka mga Parokya kung asa sila nahisakop.