Pagpasaylo, Dili Paghukom

Ika-5 Domingo sa Kwaresma (April 6, 2025)
Is 43:16-21 / Ps 126:1-2, 2-3, 4-5, 6 / Phil 3:8-14 / Jn 8:1-11

Dali ba kita mohukom sa mga tawo nga atong giisip nga makasasala?

Basin sama ra kita sa mga Pariseo ug mga eskriba nga dali kaayo sa paghukom sa babaye nga nahulog sa sala sa pagpanapaw. Gidala nila ang babaye kang Hesus uban ang paglaum nga si Hesus mismo ang maghimo ug paghukom batok kaniya. Apan, napakyas sila kay mas gipalabi ni Hesus ang pagsabot ug pagpakita ug kalooy sa babaye.

Pila ka higayon kita, sama sa mga Pariseo, dali nga mohukom batok sa uban nga wala magtan-aw sa atong kaugalingong mga kalapasan? Ang tubag ni Hesus sukwahi man kini sa mga Pariseo, dili aron pagpasagad sa sala sa babaye, apan aron ipakita ang kalooy ug madasig siya sa pagbag-o sa iyang kaugalingon.

Samtang naghandum kita sa kabag-ohan sa kagahi sa kasing-kasing sa mga Pariseo, atoa usab lantawon ang mga kasamtangang nahitabo sa atong palibot, mga hagit nga nakapagahi sa mga kasing-kasing sa uban ug nakapapukan kanato isip mga piniyalan sa Dios. Ang panaglalis diha sulod sa pamilya, ang dili pagsinabtanay sa mga magsilingan, ang pagkabahin-bahin sa katilingban ug ang kagubot sa atong nasud. Mahimong sayon ra ang pagtudlo sa mali sa uban, dali ra magpasangil ug mohukom, apan pamalandongan nato kung kini ba ang igong tubag sa atong mga giagian nga kalisdanan.

Dali ra ang paghukom apan ato usab hunahuanon nga kitang tanan adunay kaugalingong mga kahuyang ug kakulangan, ug usahay, ang pinakamaayong butang nga atong mahatag mao ang pagsabot, pagpabati sa kalooy pinaagi sa pagpasaylo ug pagtinabangay aron molambo ang matag usa kanato. Gani, niining panahon sa kwaresma atong gi-andam ang atong mga kaugalingon sa hingpit nga kausaban, nga molambo kita sa atong relasyon sa Dios nga puno sa grasya nga magdapit kanato sa paghinulsol ug pagbag-o. Kini nga panahon usab nag-awhag kanato sa pagpakita sa samang kalooy nga gihatag ni Hesus kanato, labi na ngadto sa mga nagkalisud, ug nagtinguha sa kabag-ohan ug kalamboan sa kaugaligon.

Busa, dili kita maghukom! Magtinabangay kita alang sa kabag-ohan. Dili sayon, apan, kaya natong buhaton uban sa dakong paglaum. Sugdan nato kini sa atong kaugalingon nga mao ang pahinumdum ni Hesus sa katapusan sa Ebanghelyo. Sama sa babaye kita usab gidapit sa paglakaw, ug sugdan ang bag-ong kinabuhi, kalimtan ang mga nangagi kay ang Dios kanato nagpasaylo. (Sem. Roldan Baliano)