Tawag sa Pag-alagad

Marso 25, 2025 – Mary Mediatrix of All Grace Cathedral. Sa grasya ug gugma sa Diyos, midawat sa Orden sa Pagkapari si Rev. Francis Tom Aradillos pinaagi sa pagpandong sa mga kamot ni Labing Talahurong Obispo Guillermo Afable, D.D. Ang maong ordinasyon natakdo sa pagsaulog sa Solemnidad sa Pagpamulong sa Anghel sa Mahal nga Birhen Maria (Annunciation of the Lord) usa ka mahinungdanong selebrasyon sa pagpakita sa kabubut-on sa Diyos sa kinabuhi sa tawo.

Matod pa ni Bishop Afable, kini nga mga pulong nag-aghat kanato sa pagpili sa kinabuhing masulondon sa Diyos. Kini mao ang sukaranan sa bokasyon sa usa ka pari, dili ang kaugalingong kabubut-on, kundili ang pagsunod sa kabubut-on sa Ginoo.

“Here I am, Lord… to do Your will, not mine.”

Gipahinumdom usab ni Bishop Afable ang bili sa pagtuman ug pagsalig sa Diyos bisan sa mga pagsulay sa kinabuhi. Ang pagsunod sa kabubut-on sa Diyos dili sayon, tungod kay kini nagkinahanglan sa paghalad sa kaugalingon sama sa gipakita sa Mahal nga Birhen Maria. “Ang tinuod nga pagtuman naggikan sa gugma. Kung walay gugma, mahimong lisod ang pagtuman.”

Gitambongan sa daghang katawhan ang ordinasyon, lakip ang mga diocesan ug religious nga kaparian, konsagradong relihiyoso, ug ang mga mahigugmaon sa kinabuhi ni Rev. Francis Tom, sama sa iyang ginikanan, igsoon, kahigalaan, ug mga parokyano sa Immaculate Conception Parish, Kiblawan, diin siya naggikan. Atol usab sa ordinasyon, makahuluganon nga giconsagrar ni Fr. Tom ang iyang kaugalingon isip pari diha sa Mahal nga Birhen Maria, pagpahayag sa iyang tibuok kasingkasing pag-alagad sa Simbahan.

Sa wala pa matapos ang Santos nga Misa, gipahibalo sa Obispo ang assignment ni Rev. Fr. Francis Tom isip pari, sa Parokya ni San Miguel Arkanghel sa Matanao, diin siya mag-alagad isip assistant parish priest. Kini usa ka timailhan sa iyang bag-ong misyon, dili lamang isip usa ka pari, kundi isip usa ka sulugoon sa katawhan sa Diyos.

Ang pagkapari usa ka dakong grasya apan usa usab ka hagit sa pag-alagad, pagsakripisyo, ug pagpakabana sa kaluwasan sa mga katawhan. Dili kini usa lang ka bokasyon, kundili usa ka tawag sa gugma ug pagpangalagad, sama sa paghigugma sa Diyos kanato ug sa iyang pagpanghupot kanato sa tanang yugto sa atong panaw. (Dominic Paul Amisola | Photos: SUGID)