NAMFREL Mosuporta sa ACE-COM/PPCRV

Nakighiusa karon ang National Movement for Free Elections (NAMFREL) tali sa Archdiocesan Citizens Engagement Committee (ACE-COM), ang citizens arm sa Parish Pastoral Council for Responsible Voting (PPCRV) sa Arkidayosis sa Dabaw.

Sa ulahing panagtigom sa ACE-COM, Abril 10, 2025, gikumpirmar ni NAMFREL Chairman sa Davao nga si Rev. Fr. Archimedes “Kim” Lachica nga nagpaghigayon usab ug recruitment ang NAMFREL nga ipakatag sa tibuok syudad alang sa National ug Local nga Piniliay.

Si Fr. Lachica kinsa aktibong misalmot sa citizen’s arm sukad pa sa tuig 2006, ug natudlong District 1 Coordinator sa milabay nga mga piniliay sa E-CHAMP (Elections for Clean, Honest, Accurate, Meaningful and Peaceful) nagpadayag nga dako ang iyang kalipay sa kalambuan sa citizen’s arm sa Arkidayosis sa Dabaw.

“I’m happy to leave Davao – you have grown in political education down to the GKKs and the vicariates with the proper formation,” siya nagkanyon human nga nagpahibalo nga itunol na niya sa lain ang papel sa District Coordinator sa unang Distrito sanglit kinahanglang iyang tutukan ang pagpangandam sa NAMFREL sa Dabaw ug alang sa iyang bag-ong destino sa mosunod nga mga adlaw.

Dugang pa niya nga gi-presentar na niya ngadto sa NAMFREL sa kauluhan nga naka-organize na ug ACE-COM sa Davao nga partner sa PPCRV.

Sa gihimong organizational chart sa ACE-COM, dunay duha ka mga sanga ubos sa District Coordinator: ang ACE-COM Parish Coordinator nga si Mutya Woo sa St. Jude Parish ug atbang niini ang ACE-COM School Coordinator nga si Dr. Corazon Umblero sa University of the Immaculate Conception. Busa gikasabutan atol sa panagtigom nga itugyan ang First District Coordinator nga katungdanan ngadto skang Dr. Umblero.

Hinoon, mipasalig si Fr. Lachica nga ang mga mo-boluntaryo ubos sa NAMFREL itugyan gihapon ngadto sa ACE-COM ilabi na sa mga buluhaton nga dili maatiman sa ACE-COM sama sa paghatag ug mga IT EXPERTS nga mag-monitor sa digital nga kalihukan sa Automated Counting Machines atol sa pagboto ug sa transmission, pag-escort sa mga election paraphernalia, pagsaksi sa paghimoong Random Manual Audit human sa piniliay, errands ug uban pa nga mga panginahanglan.

Malipayong gidawat ang maong balita sa ACE-COM Director Rev. Fr. Leonardo Dublan Jr. ug sa Davao Association of Catholic Schools (DACS) Executive Director Jimmie Loe Dela Vega.

Hinoon gipadayag usab ni Fr. Lachica ang panghinaut nga mahisama ang ACE-COM sa syudad sa Cebu nga gitawag ug BARUG CEBU nga direkta na giila sa COMELEC nga maoy citizen’s arm alang sa maong dapit, ug ang papel sa PPCRV mao na lamang ang pagsuporta kanila.

Gibatbat usab ni Fr. Lachica ang mga detalye sa mga buluhaton sa district coordinators isip liaison sa ACE-COM ngadto sa COMELEC ug ang pag-lantaw sa hapsay nga paglihok sa mga volunteers sa ilang tagsa-tagsa ka mga buluhaton.

Lakip sa mga importanteng mga buluhaton atol sa piniliay mao ang pagkuiha sa Election Returns, ang ika-upat nga kopya alang sa PPCRV ug ang mosunod niini ang kopya sa NAMFREL. Gikauyonan sa ulahing panagtigom nga ang mga madestino sa maong buluhaton, mokabat sa 1173 nga mga volunteers magdala sa ID sa NAMFREL ug sa ACE-COM.

Alang kaniya nga ang piniliay ning tuiga kritikal ug mahinungdanon kaayo sanglit mamahimong ma-desisyonan niini ang kapalaran ni Vice Presidente Sara Duterte sa iyang impeachment case sanglit pilion ang walo ka mga senador ug pilion usab sa matag Distrito ang ilang representante ngadto sa Kongreso ug usa ka representante alang sa party list. Sa pagkakaron, wala pa gisugdan sa Senado ang pagtuki sa impeachment case.

Tungod niini, sama sa nangaging piniliay, dunay mga langyaw nga mga obervers nga pagadawaton sa NAMFREL ug itugyan ngadto sa ACE-COM aron nga maggiyahan kung asa ang mga Voting Centers ipadala.

Sa pagkakaron, hingusgan sa ACE-COM ug NAMFREL ang pag-recruit ug mga volunteers aron makab-ot ang 100% coverage sa 266 voting centers nga dunay kinatibuk-ang 1,173 clustered precincts.

Mamahimong magpalista sa tagsa-tagsa ka mga Parokya o mga tulunghaan o sa upisina sa Archdiocesan Social Action Center (ASAC) nga nahimutang sa 2nd floor, Caritas building, sa luyo sa San Pedro Cathedral.