San Vicente: Sumbanan sa Pagkamatarong

Malipayong gisaulog sa GKK San Vicente Ferrer Vincent Heights sa Mamay Road, Davao City nga sakop sa St. Francis of Assisi Parish Laverna ang ilang ika-26 nga Kapistahan. Gisaulog ang mga usa ka Santos nga Misa kaniadtong Abril 5, 2025 nga gipanguluhan sa ilang Kura Paroko nga si Rev. Fr. Pedro “Pete” Lamata sa alas 6:30 sa gabii.

Si San Vincent Ferrer, usa ka inila nga Aragonese Dominican nga prayle ug magwawali, nabuhi gikan sa 1350 hangtod 1419, naila sa iyang gamhanang mga sermon ug misyonaryo nga buhat, ilabina sa panahon sa Great Western Schism, ug na-canonize niadtong 1455.

Sa homiliya ni Fr. Pete iyang gipaambit nga inspirasyon si San Vicente sa pagkamatarong ug pagpuyo sa pagkamatarong ilabina sa Panahon sa kuwaresma diin kita naglaraw nga mahibalik sa sabakan sa Diyos.

Dugang niya nga sa imahe ni San vicente, makita ang simbolo sa usa ka pako diin nagpadayag nga bisan asa maabot ang misyon sa Ebanghelisasyon. Si San Vicente nagbitbit usab og usa ka Rosaryohan nga nagtimaan sa Debosyon sa Mahal nga Birhen Maria

Nanghinaot ang Kura Paroko nga unta madasig ang katilingban sa pagsubay ug pagpuyo sa Mission Evangelization sama sa ilang patron.

Tuod man dili sama sa miaging ika-25 nga kapistahan sa katilingban, nga adunay daghang kalihukan ug aktibidades, ang kapistahan karong tuiga nag sentro lamang sa novena ug Santos nga Misa tungod kay kabahin kini sa ilang gihimong pagpangandam sulod sa Panahon sa Kuwaresma.

Miduyog sa Kapistahan sa katilingban ang mga kasikbit nga GKKs ug laing Sona sa maong parokya. Pagkahuman sa Santos nga Misa adunay salo-salo ug kantahan nga naghatag og kalingawan sa mga nangaon.

Viva Sr. San Vicente Ferrer!

(By Allyza Hope Tabigue)