Ang kalinaw ibilin ko Kaninyo

Ika-6 nga Domingo sa Pagkabanhaw (May 25, 2025)
Acts 15:1-2, 22-29 / Ps 67:2-3, 5, 6, 8 / Rv 21:10-14, 22-23 / Jn 14:23-29

Bag-o pa lamang atong giampo nga malinawon ang milabay nga lokal ug nasudnong piniliay. Tataw sa atong mga pagbasa karong Dominggoha nga ang matuod nga kalinaw gasa gikan sa Dios kay si Kristo mao man ang atong kalinaw.

Niining ikaunom nga Dominggo sa Pagkabanhaw, una sa tanan, diha sa Ebanghelyo gipahimangnoan kita nga kining kalinaw maangkon lamang nato kung kita nagtuman sa sugo sa Dios. Kung magtuman kita sa atong kaugalingon, dako gayod ang puruhan sa kaguliyang ug kagubot. Kay sama sa usa ka ginikanan diha sa panimalay, walay balaod niya nga himuon aron magkagubot ang managsuon. Buot gayod niya nga adunay pagrespeto ug pagdawat sa usa’g usa aron mahapsay ang tanan. Kita kaha isip mga binunyagan o molupyo sa nasod, gitamod ba nato ang balaod nga gihimo alang sa kahapsay sa sosyodad ug ang sugo Dios nga gipadayag diha sa atong Kristohanong katilingban o Simbahan? O ato lang ba nga interes ang atong gipasikad?

Ikaduha, maangkon nato kining kalinaw kung, sama sa gisulti sa unang pagbasa atong huptan ang usa ka tumong isip mga tinun-an ni Kristo. Sa panahon nga adunay kalibog, andam unta kita nga mokonsulta ug maminaw sa usa’g usa ug sa mga pangulo nga gitahasan nga mogiya kanato. Niining bag-o pa lamang natapos nga piniliay sa politika, andam ba kita nga molihok alang sa usa ka tumong o magpabilin ba kitang magmagahi sa atong kaugalingon nga gusto? Makadawat ba kita nga mopanaw nga hiniusa sa usa ka tumong pinaagi sa pag-alayon sa atong mga pangulo ug lideres bisan asa man kita midapig alang sa kaayohan sa tanan?

Ug ikatulo, sama sa gisaysay sa ikaduhang pagbasa, ang kalinaw modan-ag kanato kung tugutan nato nga ang himaya ug Kordero sa Dios maoy atong tugutan nga mosanag kanato. Sama sa mapaubsanong sakripisyo sa Kordero nga mao si Kristo nga nabanhaw, kita usab unta andam nga mosakripisyo alang sa kadaghanan. Mosalig ba kita nga ang kahayag sa atong pagtahan sa kaugalingon maoy makapapaspas sa paghari sa kalinaw? Madawat ba nato nga kung dili ang atong kaugalingon lamang apan ang konsensiya sa matag usa maoy paharion atong maangkon ang kalinaw?

Paharion unta nato ang kalinaw nga gibilin kanato sa Manluluwas nga nabanhaw. Tugutan unta nato nga siya nga atong kalinaw maoy mopuyo sa matag usa kanato. Kay kinsa ba diay ang wala nangandoy sa matuod nga kalinaw? Andam ka ba nga mahimong instrumento niining maong kalinaw?